بخدمت گرامی مخدومی محترم المقام حضرت مولانا محمد یوسف صاحب زاد مجدکم !
السلام علیکم ورحمۃ اللہ تعالیٰ وبرکاتہ !
الحمد للہ! بندہ بعافیت ہے ، اللہ تعالیٰ آنجناب کو بعافیت رکھے۔ کئی روز سے ایک عریضہ ارسالِ خدمتِ بابرکت کیا ہے (بہ پتہ کراچی) مگر اب تک جواب سے شرف یاب نہیں ہوا، اللہ تعالیٰ بخیر رکھے، اُمید ہے کہ خیریتِ مزاج سے مطلع فرمائیںگے۔ طباعت کا کام تو غالباً شروع ہوگیا ہوگا۔ طباعت میں کس تالیف سے افتتاح ہوا ہے؟ اللہ تعالیٰ ہر طرح سے کامیابی عطا فرمائے۔ یہاں اس ماہ میں بہ کثرت بارشیں ہوئی ہیں، سخت سردی رہی، اب کچھ کم ہو رہی ہے۔ خیریتِ مزاج سے اور جملہ حالات سے مطلع فرماویں۔ آپ کی مخلصانہ دعاؤں کا بے حد محتاج ہوں، امید ہے کہ اپنی دعاؤں میں مجھے ضرور یاد فرماتے رہیںگے۔ بندہ تو جناب کو اور جناب حاجی محمد یعقوب صاحب کو کبھی بھولتا ہی نہیں۔ جناب مولانا طفیل احمد صاحب سلمہ ، جناب حاجی صاحب، ان کے صاحبزادگان کی خدمات میں سلامِ مسنون اور دعا کی درخواست۔ عبد الرحمن
دارالعلوم قاسمیہ ،۲۳/جمادی الاولیٰ ۷۳ھ
بخدمتِ گرامی مخدومی محترم المقام حضرت مولانا محمد یوسف صاحب بارک اللّٰہ في علومکم وأعمالکم!
السلام علیکم ورحمۃ اللہ تعالیٰ وبرکاتہ!
گرامی نامہ سامی نے مشرف فرمایا، خیریتِ مزاج معلوم ہوکر اطمینان ہوا، الحمد للہ! یہ ناکارہ خادم بھی بعافیت ہے۔۔۔۔اللہ تعالیٰ آپ کی مساعیِ جمیلہ کو کامیاب فرمائے۔ احقر کی طبیعت کئی روز سے اچھی نہیں، نیند کی کمی کی شکایت (جو میرا پرانا مرض ہے) بہت دنوں سے لاحق ہے، دعاء صحت کی درخواست ہے۔ حضرت ابن عباسؓ کے مذہب کے متعلق آنجناب کے ارشاد سے اشکال کا استیصال نہیں ہوا، کیا اُن کے نزدیک محرم بالحج طوافِ قدوم سے ہمیشہ محروم رہے گا؟ نیز سعی واجب کیسے کرسکتا ہے، جبکہ وہ طواف پر مرتب ہے؟ (جو بھی ہو) معتمر کے لیے اُن کی سعی کی کیا صورت ہوگی، جبکہ وہ طواف سے حلال ہوجاتاہے تو بحالتِ حلت سعی کیسے کرے گا؟ اگر کسی وقت فرصت ہو اور مفصل ارشاد فرمایا جائے تو بہتر ہوگا۔
دعاؤں کا خواستگار ہوں، سر پر موت قریب آپہنچی، عمل کچھ بھی نہیں، دعا فرمائیں کہ اللہ تعالیٰ توفیقِ اعمالِ خیر عطا فرماکر حسنِ خاتمہ سے نوازدے، خادم زادگان کی طرف سے سلامِ مسنون اور دعا کی درخواست۔ بندہ ہر وقت آنجناب کا دعاگو ہے۔
حضرت مولانا طفیل احمد صاحب سلمہٗ، حضرت حاجی صاحب کی خدمات میں سلامِ مسنون اور دعا کی درخواست ۔ عبد الرحمن
۱۹/رجب ۷۳ھ از دارالعلوم قاسمیہ
مخدومی المکرم محترم المقام حضرت مولانا محمد یوسف صاحب زادت محاسنکم!
السلام علیکم ورحمۃ اللہ تعالیٰ وبرکاتہ!
الحمد للہ! بندہ ناکارہ مع جملہ متعلقین بعافیت ہے، خدا کرے مزاجِ سامی بھی بعافیت ہوں۔ ۱۰/رمضان المبارک کا گرامی نامہ آج ۱۳/رمضان المبارک کو پہنچ کر کاشفِ احوال ہوا۔ خیریت معلوم ہوکر اطمینان ہوا۔ اللہ تعالیٰ آنجناب کو جزاء خیرِ دارین عطا فرمائے کہ برادر مولانا عبد الحبیب صاحب کو آنجناب نے اپنی رفاقت کے لیے منتخب فرمایا، معاش کی وجہ سے تو وہ زیادہ پریشان نہ تھے، مگر باقاعدہ درس وتدریس کے کام نہ ہونے کی وجہ سے پریشان تھے، خدا کرے ان کی یہ پریشانی آنجناب مخدوم کی توجہ سے رفع ہوجائے۔
اس سے پہلے کا گرامی نامہ موصول ہوا تھا، مگر صحیح جائے قیام کے معلوم نہ ہونے کے وجہ سے عریضہ ارسال نہ کرسکا، جس کی ندامت کے ساتھ معافی چاہتا ہوں۔ آنجناب کی صحت کی خرابی سے فکر اور صدمہ ہے۔ خداوند تعالیٰ ہمیشہ صحت وعافیت کے ساتھ اپنی مرضیات میں مشغول رکھے۔ جناب کا وجود موجودہ زمانۂ قحط الرجال میں اُمت کے لیے خدا تعالیٰ کی رحمت ہے، اس لیے آنجناب کے لیے ازبس ضروری ہے کہ آپ اپنی صحت کا زیادہ سے زیادہ خیال رکھیں، افکار واشغال اپنے ذمہ اتنے نہ لیں، جس کا تحمل نہ ہو سکے اور صحت پر اثر انداز ہو۔ اللہ تعالیٰ آنجناب کے فیوض اور برکات کو تادیر قائم رکھے اور اُمتِ مرحومہ کو فیوض وبرکات سے تادیر استفادہ کا موقع دے۔ آپ جیسے مخلصین صلحاء کی دعاؤں کا بے حد محتاج ہوں۔
علم اولاً تو کچھ ہے نہیں، جتنا ہے بھی اس پر عمل کی توفیق نہیں، دعا فرمادیں کہ اللہ تعالیٰ عمل کی توفیق عطا فرمائے اور حسنِ خاتمہ سے نوازے۔
خادم زادہ عبید الرحمن کے لیے آنجناب کے جوار میں اگر کوئی جگہ مل جائے تو زیادہ مناسب ہے، تاکہ فیوض وبرکات سے بھی استفادہ کرسکے۔
اللہ تعالیٰ احقر کے اور آنجناب کے جملہ مقاصدِ حسنہ پورے فرمائے۔ فقط والسلام
دعا گو، دعا خواہ
ناکارہ عبدالرحمن غفرلہٗ
از بہبودی ، ملک مالا
۱۳؍ رمضان المبارک ، چہار شنبہ
