بِسْمِ اللَّهِ الرَّحْمَنِ الرَّحِيم

8 رمضان 1445ھ 19 مارچ 2024 ء

بینات

 
 

ڈیبٹ کارڈ پر ملنے والے ڈسکاؤنٹ کا شرعی حکم

ڈیبٹ کارڈ پر ملنے والے ڈسکاؤنٹ کا شرعی حکم


کیا فرماتے ہیں مفتیانِ کرام اس مسئلہ کے بارے میں کہ:
میرا ایک میزان بینک کا کرنٹ اکاؤنٹ ہے، جس کا پلانٹینم ڈیبٹ کارڈہے، سوال یہ ہے کہ بینک کی طرف سے اکثر ڈسکاؤنٹ آفرز آتی رہتی ہیں، آن لائن شاپنگ (دراز، فوڈ پانڈہ) پر 10% ، کبھی 30%، کبھی کھانے پر جاکر ڈسکاؤنٹ جیسے کباب جیز وغیرہ پر 50%آف، کسی ریسٹورنٹ پر 25%آف، کبھی ایسی آفرز بھی آتی ہیں جس میں میزان بینک کے سلور اینڈ گولڈ ڈیبٹ کارڈ پر 10%آفر ہوتی ہے، جبکہ میرے پلانٹینم پر 25% ۔ 
ایسی آفرز اور ڈسکاؤنٹ لینا اسلام میں جائز ہے؟ میرا میزان بینک (اسلامک بینک) ہے، اسی طرح کوئی آفر اگر یو بی ایل بینک میں ہو جو کہ اسلامک بینک نہیں ہے تو اس کا بھی بتادیں کہ ایسی صورت میں بینک کے ڈیبٹ کارڈ پر ڈسکاؤنٹ لینا جائز ہے یا نہیں؟ مستفتی:کاشان گلفراز

الجواب حامدًا ومصلیًا

ڈیبٹ کارڈ کے استعمال پر ملنے والی رعایت (ڈسکاؤنٹ) کی چند صورتیں ہیں:
1 :اگر ڈسکاؤنٹ کی رقم بینک بھرتے ہیں تو یہ ناجائز اور حرام ہے، کیوں کہ یہ رعایت بینک کی طرف سے کارڈ ہولڈر کو اپنے بینک اکاؤنٹ کی وجہ سے مل رہی ہے جو شرعاً قرض کے حکم میں ہے اور جو فائدہ قرض کی وجہ سے حاصل ہوتا ہے، وہ سود کے زمرے میں آتا ہے، نیز بینک سودی رقم سے اس کو ادا کرے گا، اس لیے بھی اس سے استفادہ جائز نہیں ہوگا۔ ہندیہ میں ہے:
’’أہدی إلٰی رجل شیئًا أو أضافہ، إن کان غالب مالہ من الحلال، فلابأس إلا أن یعلم بأنہ حرام، فإن کان الغالب ہو الحرام ینبغي أن لایقبل الہدیۃ۔‘‘  (فتاویٰ ہندیہ، کتاب الکراہیۃ، الباب الثاني عشر في الہدایا والضیافات، ج:۵، ص:۳۴۲، ط:دارالفکر)
2 : اور اگر یہ ڈسکاؤنٹ ادارے کی جانب سے ہے جہاں سے کچھ خریدا گیا ہے یا کھانا کھایا گیا ہے، تو اس صورت میں یہ رعایت حاصل کرنا جائز ہے، کیونکہ یہ اس ادارے کی طرف سے تبرُّع واحسان ہے اور اس میں کوئی قباحت نہیں ہے۔ ’’بدائع الصنائع‘‘ میں ہے:
’’للمالک أن یتصرف في ملکہٖ أي تصرف شاء۔‘‘ (کتاب الدعویٰ، ج:۶، ص:۲۶۴، ط:سعید)
3 : اگر یہ ڈسکاؤنٹ دونوں کی جانب سے ہو، تو بینک کی طرف سے دی جانے والی رعایت جائز نہیں ہوگی اور اس سے استفادہ کرنا جائز نہیں ہوگا اور ادارے کی طرف سے دی جانے والی رعایت جائز ہوگی، لیکن حرام اور حلال مخلوط ہونے کی صورت میں اجتناب کرنے میں عافیت ہوگی۔
4 : اگر یہ ڈسکاؤنٹ نہ تو بینک کی طرف سے ہو اور نہ ہی جس ادارے سے خریداری ہوئی ہے اس کی طرف سے ہو، بلکہ ڈیبٹ کارڈ بنانے والے ادارے کی طرف سے ہو، تو اگر اس ادارے کے تمام یا اکثر معاملات جائز ہوں اور ان کی آمدن کل یا کم از کم اکثر حلال ہو تو اس صورت میں ڈسکاؤنٹ سے مستفید ہونے کی اجازت ہوگی۔
5 : اور اگر معلوم نہ ہو کہ یہ رعایت کس کی طرف سے ہے، تو پھر اجتناب کرنا چاہیے۔
مسلم شریف میں ہے:
’’عن النعمان بن بشیرؓ، قال: سمعتہ یقول: سمعتُ رسولَ اللہ صلی اللہ علیہ وسلم یقول: -وأہوی النعمان بإصبعیہ إلٰی أذنیہ- إن الحلال بین، وإن الحرام بین، وبینہما مشتبہات لایعلمہن کثیر من الناس، فمن اتقی الشبہات استبرأ لدینہ، وعرضہ، ومن وقع في الشبہات وقع في الحرام، کالراعي یرعی حول الحمٰی، یوشک أن یرتع فیہ، ألا وإن لکل ملک حمی، ألا وإن حمی اللہ محارمہ، ألا وإن في الجسد مضغۃً، إذا صلحت صلح الجسد کلہ، وإذا فسدت فسد الجسد کلہ، ألا وہي القلب۔‘‘ (صحیح مسلم، ج:۳، ص:۱۲۱۹، ط:دار إحیاء التراث العربي)
                                                                                                                                                                                                                                                                                                                                                                                                                                                                                                                                                                                                                                                                                                                                                                              فقط واللہ اعلم

 

  

فقط واللہ اعلم

الجواب صحیح

الجواب صحیح

کتبہ

ابوبکر سعیدالرحمن  

محمدانعام الحق

نوشاد علی

الجواب صحیح

 

تخصص فقہ اسلامی

محمد عبدالقادر

 

جامعہ علوم اسلامیہ علامہ محمد یوسف بنوری ٹاؤن 

 

تلاشں

شکریہ

آپ کا پیغام موصول ہوگیا ہے. ہم آپ سے جلد ہی رابطہ کرلیں گے

گزشتہ شمارہ جات

مضامین