سوال

اگر کوئی عورت کسی مجبوری کے تحت دبئی سے پاکستان کا سفر بغیر محرم کے کرے تو کیا اس کی کوئی گنجائش ہوگی؟

جواب

عورت کے لیے محرم کے بغیر  سفرِ شرعی کی مسافت یا اس سے زائد مسافت سفر کرنا شرعاً منع ہے اور سفر کرنے کی صورت میں وہ گناہ گار ہوگی جس پر  توبہ و استغفار کرنا ضروری ہے۔

  حضرت عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: کوئی مرد کسی عورت سے تنہائی میں نہ ملے اور کوئی عورت سفر نہ کرے، مگر اس حال میں کہ اس کے ساتھ اس کا محرم ہو، تو ایک شخص نے عرض کیا: اے اللہ کے رسول ﷺ میرا نام فلاں فلاں غزوے (جہادی لشکر) میں لکھا گیا ہے، اور میری بیوی حج کے لیے نکل چکی ہے، آپ ﷺ نے فرمایا: اب تم اپنی بیوی کے ساتھ حج کرو۔ (بخاری ومسلم، بحوالہ مشکاۃ) فقط واللہ اعلم