اکثر لوگ تشہد میں شہادت کے وقت انگلیوں کا حلقہ بناتے ہیں اورشہادت کے بعد بھی اس حلقہ کو آخر تک باقی رکھتے ہیں، کیا انگلیوں کا حلقہ بناناکسی حدیث سے ثابت ہے اور حلقہ کو آخر تک قائم رکھنے کا کیا حکم ہے ؟
تشہد میں" اشهد ان لا اله"پڑھتے وقت دائیں ہاتھ کی انگلیوں کو بند کرکے، انگوٹھے اور بیچ والی انگلی کا حلقہ بنا کر شہادت کی انگلی سے اشارہ کرنا اور" الا الله "پر شہادت کی انگلی کو جھکادینا اور آخر تک حلقہ قائم رکھناسنت ہے۔ سنن ابوداود اور ابن ماجہ میں حلقہ بنانے کا مذکورہ طریقہ صراحتاً درج ہے، نیز موطا امام محمد اور ترمذی کی روایات سے بھی اس کی تائید ہوتی ہے۔ اس حوالے سے مولانا ظفر احمد عثمانی رحمہ اللہ کی "اعلاء السنن " میں کئی روایات نقل کرکے مفصل بحث کی گئی ہے، اسے ملاحظہ کرلیاجائے۔ فقط واللہ اعلم
فتوی نمبر : 143810200037
دارالافتاء : جامعہ علوم اسلامیہ علامہ محمد یوسف بنوری ٹاؤن