سوال

اہلیہ کے بھائی کے رشتہ کے لیے جلد استخارہ نکلوانا ہے ۔ لڑکی کا نام: ۔۔۔، والدہ: ۔۔۔  لڑکے کا نام :۔۔۔، والدہ: ۔۔۔

جواب

جامعہ کی ویب سائٹ پر شرعی مسائل کی راہ نمائی جاتی ہے، یہاں استخارہ نہیں کیا جاتا، نیزاحادیثِ مبارکہ سے معلوم ہوتاہے  کہ جس شخص کی حاجت ہو وہ خود استخارہ کرے،  نبی کریم صلی اللہ علیہ وسلم صحابہ کرام رضی اللہ عنہم کو استخارہ کا طریقہ اس اہتمام سے تعلیم فرماتے تھے جیسے قرآن کریم کی سورت یا آیت۔ اور صحابہ کرام رضی اللہ عنہم کی زندگی سے بھی یہ بات معلوم ہوتی ہے کہ وہ حضور اقدس صلی اللہ علیہ وسلم سے اپنے امور میں مشورہ تو لیتے تھے، لیکن آپ صلی اللہ علیہ وسلم سے "استخارہ" نہیں کرواتے تھے، حال آں کہ نبی کریم صلی اللہ علیہ وسلم سے مقدس وبرگزیدہ کوئی فردِ بشرنہیں ہوسکتا، نیز اس وقت وحی بھی نازل ہوتی تھی جس کی روشنی میں خیر وشر یقینی طورپر معلوم ہوسکتاتھا، لیکن نبی کریم صلی اللہ علیہ وسلم نے صحابہ کرام رضوان اللہ علیہم اجمعین کے واسطے آنے والی پوری امت کی تربیت اس نہج پر فرمائی کہ ہرفردِ امت اللہ تعالیٰ سے خود تعلق قائم کرے، اور مہربان رب سے ہر شخص اپنی حاجت مانگنے کے ساتھ خود ہی خیر کا خواست گار ہو۔

آپ کی سہولت کے لیے ذیل میں استخارہ کے مکمل طریقہ سے متعلق جامعہ کے ایک فتوی کا لنک دیا جارہا ہے وہ ملاحظہ فرمالیجیے:

شادی کے لیے استخارہ

فقط واللہ اعلم