بِسْمِ اللَّهِ الرَّحْمَنِ الرَّحِيم

24 ذو الحجة 1442ھ 04 اگست 2021 ء

دارالافتاء

 

کسی چیز کو ہاتھ نہ لگانے کی قسم اٹھانے کے بعد قسم توڑدینا


سوال

 کسی چیز  پر بندہ قسم اٹھا لے کہ اس کو ہاتھ نہیں لگانا، لیکن بعد میں پچھتاوا ہو کیا کرنا چاہیے؟

جواب

 جائز یا  نیک کام پر اٹھائی گئی قسم کو پورا کرنا چاہیے،  گناہ کا کام کرنے  یا فرض یا واجب کو ترک کرنے پر کھائی گئی قسم پر عمل جائز نہیں ہے، اور نامناسب کام پر قسم اٹھائی ہو تو  اسے بھی توڑدینا چاہیے، لہٰذا صورتِ مسئولہ میں اگر مذکورہ چیز کو ہاتھ لگانا اچھے کاموں کے زمرے میں آتا ہو اور قسم اٹھالی کہ اسے نہیں چھوؤں گا، تو اس قسم کو توڑدینا چاہیے، قسم ٹوٹ جانے کی صورت میں اس کا کفارہ ادا کرنا ضروری ہوگا۔

قسم کا کفارہ یہ ہے کہ  دس مسکینوں کو دو وقت کا کھانا کھلا دیں  یا دس مسکینوں میں سے ہر ایک کو صدقۃ الفطر کی مقدار کے بقدر گندم یا اس کی قیمت دے دیں ( یعنی پونے دو کلو گندم یا اس کی رقم ) اور اگر جو دیں تو اس کا دو گنا (تقریباً ساڑھے تین کلو) دیں،  یا دس فقیروں کو  ایک ایک جوڑا کپڑا پہنا دیں۔ اور اگر آپ کی مالی حالت ایسی ہے کہ نہ تو کھانا کھلا سکتے ہیں اور نہ کپڑے دے سکتے ہیں تو مسلسل تین روزے رکھیں، اگر الگ الگ کر کے تین روزے پورے کر لیے  تو کفارہ ادا نہیں ہوگا۔ اگر دو روزے رکھنے کے بعد درمیان میں کسی عذر کی وجہ سے ایک روزہ چھوٹ گیا تو اب دوبارہ تین روزے رکھیں۔ فقط واللہ اعلم

 


فتوی نمبر : 144109201436

دارالافتاء : جامعہ علوم اسلامیہ علامہ محمد یوسف بنوری ٹاؤن



تلاش

سوال پوچھیں

اگر آپ کا مطلوبہ سوال موجود نہیں تو اپنا سوال پوچھنے کے لیے نیچے کلک کریں، سوال بھیجنے کے بعد جواب کا انتظار کریں۔ سوالات کی کثرت کی وجہ سے کبھی جواب دینے میں پندرہ بیس دن کا وقت بھی لگ جاتا ہے۔

سوال پوچھیں