سوال

پرائز بانڈ کی خرید اور اس پر بذریعہ قرعہ اندازی ملنے والی رقم کا شرعی حکم کیا ہے؟ بعض لوگ اس پر ملنے والی رقم کو سود نہیں قرار دے رہے،براہِ کرم رہنمائی فرمادیں دیں!

جواب

پرائز بانڈ  کی خرید وفروخت اور اس پر ملنے والا انعام ناجائزا ور حرام ہے،  اس میں سود اور جوا پایا جاتا ہے۔

پرائز بانڈز میں سود کا وجود تو بالکل ظاہر ہے، کیوں کہ سود کی حقیقت یہ  ہے کہ مال کا مال کے بدلے معاملہ کرتے وقت ایک طرف ایسی زیادتی مشروط ہو جس کے مقابلے میں دوسری طرف کچھ نہ ہو ،بعینہ یہی حقیقت بانڈز کے انعام میں بھی موجود ہے، کیوں کہ ہر آدمی مقررہ رقم دے کر پرائزبانڈز اس لیے حاصل کرتا ہے کہ اس سے قرعہ اندازی میں نام آنے پر اپنی رقم کے علاوہ  زیادہ رقم مل جائے ،اور یہ زائد اور اضافی رقم سود ہے، کیوں کہ شر یعت میں ایک جنس کی رقم  کاتبادلہ اگر  آپس میں  کیا جائے تو برابری کے ساتھ لین دین کرنا ضروری ہوتا ہے، کمی بیشی کے ساتھ لین دین کرنا سود ہے،اسی طرح سود کی ایک اور حقیقت جو قرآن  کریم کے نازل ہونے سے پہلے بھی سمجھی جاتی تھی  وہ یہ تھی کہ قرض دے کر اس پر نفع لیاجائے ،سود کی یہ تعریف ایک حدیث میں ان الفاظ کے ساتھ آئی ہے ”کل قرض جر منفعة فهو ربوا“ یعنی ہر وہ قرض جو نفع کمائے وہ سود ہے،  لہٰذا اس سے ثابت ہوا کہ جو زیادتی قرض کی وجہ سے حاصل ہوئی ہووہ بھی سود میں داخل ہے، اور سود کی یہ حقیقت بانڈز کے انعام پر بھی صادق آتی ہے، کیوں کہ  بانڈز کی حیثیت قرض کی ہوتی ہے،  حکومت اس قرضہ کو استعمال میں لاتی ہے اور قرضہ کے عوض لوگوں سے ایک مقررہ مقدار میں انعام کا وعدہ کرتی ہے اور پھر قرعہ اندازی کے ذریعے انعامی رقم  کے نام سے سود کی رقم لوگوں میں تقسیم کردی جاتی ہے، جو ناجائز اور حرام ہے۔

اسی طرح پرائزبانڈ ز  میں ’’جوا‘‘ بھی شامل ہے اور ’’جوا‘‘  ہر وہ معاملہ ہے جو نفع و ضرر کے درمیان دائر ہو، یعنی یہ احتمال بھی ہو کہ معمولی رقم کے عوض میں بہت سارا مال مل جائے اور یہ بھی احتمال ہو کہ کچھ نہ ملے، اور یہ ہی صورتِ حال پرائز بانڈ کی خرید و فروخت میں پائی جاتی ہے، کیوں کہ پرائز بانڈ خریدنے والے کی یہ طمع ہوتی ہے کہ اس کے بدلے ایک خطیر رقم وصول ہو جائے، اب اس میں یہ احتمال بھی ہوتا ہے کہ واقعۃً بڑی رقم حاصل ہو جائے اور یہ بھی احتمال ہوتا ہے کہ اس کے بدلے کوئی اضافی رقم وصول نہ ہو، لہذا جب یہ معاملہ ابتدا میں خطرے میں رہا، اس لیے اس میں جوا پایا گیا جو شرعاً حرام ہے۔

أحكام القرآن للجصاص ط العلمية (2/ 582):
"وحقيقته تمليك المال على المخاطرة".

واضح ہوا کہ  پرائز بانڈز جوئے اور سود کا مجموعہ ہے ، لہذا پرائز بانڈ ز کی خریدوفروخت کرنااور اس سے ملنے والا انعام حاصل کرنا شریعت کی رو سے  ناجائز اور حرام ہے۔فقط واللہ اعلم