حرمتِ مصاہرت کے متعلق ہمارے علماء کرام کے موقف میں اتنی شدت کیوں ہے ؟ جب کہ دوسرے اہلِ حق مسالک کے آئمہ کرام کی رائے سہولت کی طرف ہے، اور اب ہمارے کچھ علماء کرام کی رائے میں بھی کچھ نرمی ہے ، دیکھیے اگر ہم قرونِ اولیٰ و وسطیٰ کی بات کریں حتی کہ سو 100 سال پہلے کی بھی بات کریں تو لوگ معصوم تھے، اور فحاشی کی وہ کیفیت نہیں تھی جو آج ہے، لہذا اُس دور میں اِس احتیاط والی رائے پر عمل ممکن تھا، مگر آج کے دور میں بےحیائی و فحاشی ذہنوں کو متاثر کر چکی ہے، عرف میں عام ہو چکی ہے ، اس کی مثال یہ بھی ہوسکتی ہے کہ ایک نشہ یا شراب کا عادی مریض جس کے نشے کا علاج ہو اس کو بھی معالج یک دم نشہ نہیں چھڑواتا بلکہ بتدریج اس کے نشے کی خوراک کم کرکے اس کا علاج کرتا ہے، تو اس حرمتِ مصاہرت کے معاملے میں کیوں علماء کرام عوام کو سہولت والی رائے نہیں دیتے؟ جب کہ عوام برائی کا شکار ہوچکے ہیں ، اچھے خاصے دین دار لوگ بھی برائی کا شکار ہوجاتے ہیں ۔
آپ خود بتائیں کہ ہمارے معاشرے میں تو ویسے ہی لوگوں کے رشتے آسانی سے نہیں ہوتے، اگر اس طرح گھر ٹوٹنے لگیں تو معاشرے کا کیا حال ہوگا ؟ اس مسئلہ کی وجہ سے لوگ وہمی ہوتے جارہے ہیں ، میں خود اس ذہنی کرب کا شکار ہوگیا ہوں ، جب مجھے یہ مسئلہ نہیں پتہ تھاتو مجھے سکون تھا، اب اس الجھن نے میری زندگی کو دشوار کردیاہے، پہلے میں اپنی والدہ کی خدمت کرتا تھا، ان کے پیروں میں درد ہوتا ہے، بے چینی ہوتی ہے تو میں ان کے پیر دباتا تھا، اور اب حالت یہ ہے کہ ان کی طرف دیکھتے ہوئے بھی مجھے ڈر لگتا ہے، کہ مبادا کوئی غلط خیال نہ آجائے، اور چھوتے ہوئے ڈر لگتا ہے کہ غلط خیال کی وجہ سے اس عمر میں میری وجہ سے ان کے رشتے پر کوئی آنچ نہ آجائے ( اللّٰہ تعالیٰ بچائیں ہم سب کو )۔
مجھے ایسا لگتا ہے کہ انسان کا ذہن اس طرح کا ہوتا ہے کہ جب کسی چیز کا خوف یا خیال اس کے دماغ پر سوار ہوجائے تو وہ تقریباً ہر وقت وہی سوچتا ہے ، اور کم و بیش وہی محسوس کرنے لگتا ہے ، محترم مفتی صاحب شہوت سے چھونے پر دلیل یہ دی جاتی ہے کہ یہ سببِ ولادت کی دلالت کرتا ہے، مگر یہ بھی تو ہوسکتا ہے کہ وہ وطی نہ کرے، لہذا اب یہ چھونا سبب ولادت تو نہیں رہا ، کیا زنا کی نیت سے چھونے پر بھی حد لگے گی؟ جب کہ یہ چھونا بھی سببِ زنا کی دلیل ہے ،کیا یہ ضروری ہے کہ شہوت سے چھونے والا لازمی وطی بھی کرے گا؟ ہوسکتا ہے کہ وہ باز آجائے، وطی کرنے کے لیے تو پورا عمل کرنا پڑتا ہے، جس کو عورت روک بھی سکتی ہے، جب کہ چھونے سے عورت کو کیسے پتہ چلے گا کہ کس نیت سے چھوا ہے ؟ عورت کو چھوتے وقت اگر شہوت محسوس کی بھی جائے تو وطی کرنے کے لیے تو پورا عمل کرنا پڑے گا ، جب کہ شہوت والے خیال کو جھٹکایا بھی جاسکتا ہے ۔
ہمارے یہاں علماء کرام کی یہ بھی رائے ہے کہ حرمتِ مصاہرت میں یہ شدت اس لیے ہے کہ لوگ ماں بیٹی کی عزت پہ ہاتھ نہ ڈالیں ان میں خوف رہے، تو محترم یہ بتائیں کہ جن علاقوں میں دوسرے اہلِ حق مسالک ہیں جو شہوت سے چھونے پر حرمتِ مصاہرت کے قائل نہیں ہیں تو وہاں کیا زیادہ تر لوگوں کی ماں بیٹی کی عزتیں محفوظ نہیں ہیں ؟ محترم حرمتِ مصاہرت کے مسئلہ میں وطی تک نوبت اس لیے نہیں آتی کہ یہ مشکل کام ہے جو عام طور پر باہمی رضا مندی کے بغیر ممکن نہیں، زیادہ تر لوگوں کا شاید یہ مقصد بھی نہیں ہوتا ، جس شخص کو چھونے سے شہوت ملتی ہے وہ آگے بڑھے گا تو پکڑا جائے گا، اور شہوت تو کبھی بھی آسکتی ہے، ہمارے معاشرے میں اچھے خاصے گھرانے سب ایک ساتھ رہتے ہیں، تو وہاں یہ مسائل ہوسکتے ہیں، ایک چھوٹی گاڑی میں ماں بیٹا ساتھ بیٹھے ہوں اور بیٹے پہ شہوت کی یلغار ہو تو وہ کیا کرے؟ اسی طرح ایک کمرے میں ماں باپ بچے سورہے ہوں اور باپ کا بیوی کے بجائے بیٹی پہ ہاتھ لگ جائے تو وہ کیا کرے ؟ اسی طرح کے خیال سوچ سوچ کر لوگ وہم کے مریض ہوتے جارہے ہیں، اہلِ باطل ہم پر وار کر رہے ہیں، اور ہم ان وہموں میں اپنی زندگی برباد کر رہے ہیں۔
شہوت تو انسان میں کبھی بھی پیدا ہوسکتی ہے، جیسا آج کل کا پُرفتن دور ہے، اب لوگ اس فتنے میں مبتلا ہوچکے ہیں ، مریض بن چکے ہیں، جب کوئی مریض ہوجائے تو اس کے لیے تو گنجائش ہوتی ہے، مفتی صاحب ایک بات بتائیں کہ " جب ایک خاتون حضور صلی اللّٰہ علیہ وسلم کے پاس آئیں اور اپنی فریاد ان کے سامنے رکھی کہ ان کے شوہر نے انہیں زمانہ جاہلیت والی طلاق دی ہے جس کے نتیجے میں وہ اس پر حرام ہوچکی تھیں، اس وقت تک اس کے بارے میں حکم نہیں آیا تھا تو حضور صلی اللّٰہ علیہ وسلم نے انہیں وہی مسئلہ بتایا جو اس وقت تھا ، پھر ان خاتون نے اپنی مجبوری کا ذکر کیا کہ ان کی بچے ہیں وغیرہ وغیرہ، اور پھر ان خاتون نے اللّٰہ تعالیٰ سے دعا کی، اور اللّٰہ تعالیٰ نے ان کے حق میں قرآن مجید میں فیصلہ دیا " ، تو مفتی صاحب یہ واقعہ ذکر کرنے کا مقصد یہ ہے کہ جب ان خاتون کی مجبوری کا اسلام میں لحاظ رکھا گیا تو کیا علماء کرام عوام کی حالت پر ان کی مجبوری پر عوام کی سہولت کے لیے کسی دوسرے مسلک کے فتویٰ پر عمل کی اجازت نہیں دے سکتے؟ جب کہ وہ ان مسالک کو بھی حق پہ مانتے ہیں جن میں حرمتِ مصاہرت میں نرمی ہے۔
محترم مفتی صاحب اب چوں کہ برائی اتنی عام ہوگئی ہے کہ کم و بیش کوئی گھر اس سے محفوظ نہیں ہے ، کیا شہوت سے چھونے پر حرمتِ مصاہرت کے حکم میں فیصلہ دوسرے اہلِ حق مسلک کے فتویٰ پر نہیں ہوسکتا ؟
واضح رہے کہ انسانوں کے درمیان تعلقات اور محرم رشتے دو طرح کے ہوتے ہیں ، ایک نسب اور خون کے رشتے، اور دوسرے سسرالی رشتے، اس سسرالی رشتے کو ”مصاہرت“ کہتے ہیں ، جیسے: سسر، ساس، اور ان کے اصول یعنی ان کا پدری اور مادری سلسلہ، اور بیوی کی بیٹی، شوہر کا بیٹا وغیرہ، ان رشتہ داروں سے حرمت کو”حرمتِ مصاہرت“ کہا جاتا ہے، اسلام نے نسب اور مصاہرت دونوں قسم کے رشتوں کے احترام کا حکم دیا ہے،
ارشادِ باری تعالیٰ ہے:
{ وَهُوَ الَّذِي خَلَقَ مِنَ الْمَاءِ بَشَرًا فَجَعَلَهُ نَسَبًا وَصِهْرًا} [الفرقان: 54]
ترجمہ:”اللہ وہ ذات ہے جس نے پانی سے انسان کو بنایا اور پھر اس کو خاندان والا اور سسرال والا بنایا“۔
اور اللہ پاک نے یہ تذکرہ احسانات گنوانے کی جگہ پر کیا ہے جو ان رشتوں کی عظمت اور قابلِ احترام ہونے کی دلیل ہے۔
حرمتِ مصاہرت جس طرح نکاح سے ثابت ہوجاتی ہے اسی طرح زنا سے بھی ثابت ہوجاتی ہے،یہی احناف ، حنابلہ،اور ایک روایت کے مطابق امام مالک کا مسلک ہے اور احناف کے نزدیک شرائطِ معتبرہ کے ساتھ دواعی زنا( شہوت کے ساتھ چھونے اور دیکھنے) سے بھی حرمتِ مصاہرت ثابت ہوجاتی ہے، یہی مسلک بہت سے صحابہ رضوان اللہ علیہم اجمعین اور کبارِ تابعین رحمہم اللہ کا ہے، اور دلائلِ نقلیہ اور عقلیہ سے مؤید ومبرہن اور نہایت احوط ہے۔
لہذااگر کوئی شخص کسی عورت سے نکاح کرلے ، یا اس سے وطی کرلے خواہ نکاحِ صحیح کے بعدہو یا نکاحِ فاسد کے بعد، یا زنا کرے، یا اس عورت کو شہوت کے ساتھ کسی حائل کے بغیر چھولے یا شہوت کے ساتھ اس کی شرم گاہ کے اندرونی حصہ کی طرف دیکھ لے تو حرمتِ مصاہرت ثابت ہوجاتی ہے، یعنی اس عورت کے اصول وفروع ، مرد پر حرام ہوجائیں گے اور اس مرد کے اصول وفروع ، عورت پر حرام ہوجائیں گے۔ملاحظہ ہو:
ارشادِ باری تعالیٰ ہے:
{وَلَا تَنْكِحُوا مَا نَكَحَ آبَاؤُكُمْ مِنَ النِّسَاءِ إِلَّا مَا قَدْ سَلَفَ إِنَّهُ كَانَ فَاحِشَةً وَمَقْتًا وَسَاءَ سَبِيلًا} [النساء: 22]
ترجمہ: اور تم ان عورتوں سے نکاح مت کرو جن سے تمہارے باپ (دادا یا نانا) نے نکاح کیا ہو، مگر جو بات گزرگئی (گزرگئی) بے شک یہ (عقلاً بھی) بڑی بےحیائی ہے اور نہایت نفرت کی بات ہے۔ اور (شرعاً بھی) بہت برا طریقہ ہے۔ (بیان القرآن)
اور نکاح سے مراد یہاں وطی یعنی ہم بستری کرنا ہے خواہ وہ وطی حلال ہو یا حرام ہو، اس لیے کہ نکاح کا حقیقی معنی ”وطی “کا ہے اور ”عقدِ نکاح “اس کا مجازی معنی ہے ، لہذا آیت کا مطلب یہ ہوا کہ جس عورت سے باپ نے وطی کی ہو بیٹا اس سے نکاح نہیں کرسکتا، جیسا کہ امام ابوبکر جصاص رازیؒ تحریر فرماتے ہیں:
"فثبت بذلك أن اسم النكاح حقيقة للوطء، مجاز في العقد، فوجب إذا كان هذا على ما وصفنا أن يحمل قوله تعالى: {ولا تنكحوا ما نكح آباؤكم من النساء} على الوطء، فاقتضى ذلك تحريم من وطئها أبوه من النساء عليه؛ لأنه لما ثبت أن النكاح اسم للوطء لم يختص ذلك بالمباح منه دون المحظور، كالضرب والقتل والوطء نفسه لايختص عند الإطلاق بالمباح منه".
(أحكام القرآن للجصاص، سورۂ نساء،آیت:22، ج:3، ص:51، ط:داراحیاء التراث العربي)
اسی طرح ارشادی باری تعالیٰ ہے:
{وَلَا تَقْرَبُوا الزِّنَا إِنَّهُ كَانَ فَاحِشَةً وَسَاءَ سَبِيلًا} [الإسراء: 32]
ترجمہ: اور زنا کے پاس بھی مت بھٹکو ، بلاشبہ وہ بڑی بےحیائی کی بات ہے اور بری راہ ہے۔ یعنی اس کے مبادی و مقدمات سے بھی بچو۔ (بیان القرآن)
ابوالحسن الطبری الشافعی(متوفی 504ھ) اس آیت کی تفسیر میں لکھتے ہیں کہ اللہ تعالیٰ نے زنا اور دواعی زنا سے منع کیا اور اس کی وجہ یہ بیان کی کہ یہ ”فاحشۃ“ یعنی بے حیائی ہے، اور جہاں اپنے باپ کی منکوحہ سے نکاح کی حرمت بیان کی وہاں بھی یہی وجہ ذکر کی کہ یہ بے حیائی ہے، اس سے معلوم ہوا کہ یہ دونوں حرمت میں برابر ہیں۔
"قوله تعالى: (وَلا تَقْرَبُوا الزِّنى إِنَّهُ كانَ فاحِشَةً) ، الآية/ 32 يدل على تحريم الزنا، وهو الذي تعرى عن نكاح وعن شبهة نكاح. ووصف الله تعالى نكاح امرأة الأب بما وصف الزنا به، فقال تعالى: (وَلا تَنْكِحُوا ما نَكَحَ آباؤُكُمْ مِنَ النِّساءِ إِلَّا ما قَدْ سَلَفَ إِنَّهُ كانَ فاحِشَةً وَمَقْتاً وَساءَ سَبِيلًا) وذلك يدل على مساواته في التحريم، وبينا ما يعترض به عليه".
(أحكام القرآن للكيا الهراسي الشافعي، ج:4، ص:258، ط:دارالکتب العلمیہ)
ابو ہانیؓ سے روایت ہے کہ رسول اللہ ﷺ نے ارشاد فرمایا: جو شخص کسی عورت کی شرم گاہ کو دیکھے اس پر اس عورت کی ماں اور بیٹی حرام ہوجائیں گی۔
"عن حجاج، عن أبي هانئ، قال: قال رسول الله صلى الله عليه وسلم: «من نظر إلى فرج امرأة، لم تحل له أمها، ولا ابنتها»".
(مصنف ابن أبي شيبة، کتاب النکاح، باب الرجل يقع على أم امرأته أو ابنة امرأته ما حال امرأته، ج:3، ص:480، برقم:16235، ط: مکتبة الرشد، ریاض)
ایک شخص نے رسول اللہ ﷺ سے پوچھا کہ میں زمانہ جاہلیت میں ایک عورت سے زنا کرچکا ہوں، کیا میں اب اس کی لڑکی سے نکاح کرسکتا ہوں؟ آپ ﷺ نے جواب دیا: میں اس کو جائز نہیں سمجھتا اور یہ بھی جائز نہیں ہے کہ تو ایسی عورت سے نکاح کرے جس کی بیٹی کے جسم کے ان حصوں کو تو دیکھ چکا ہے جو حصے تو بیوی کے دیکھے گا۔
"عن أبي بكر بن عبد الرحمن بن أم الحكم، أنه قال: قال رجل: يا رسول الله، إني زنيت بامرأة في الجاهلية وابنتها، فقال النبي صلى الله عليه وسلم: " لا أرى ذلك، ولايصلح ذلك: أن تنكح امرأة تطلع من ابنتها على ما اطلعت عليه منها".
(مصنف عبد الرزاق الصنعانی ، کتاب الطلاق، باب الرجل یزنی بأخت امرأتہ، ج:7، ص:201، برقم:12784، ط:المجلس العلمی، ہند)
ایک شخص نے اپنی ساس سے زنا کیا تو اس کے بارے میں عمران بن حصین ؓ نے یہ فرمایا کہ اس کی بیوی اس پر حرام ہوگئی ہے۔
"عن قتادة، عن عمران بن حصين في «الذي يزني بأم امرأته، قد حرمتا عليه جميعاً".
(مصنف عبد الرزاق الصنعانی ، کتاب الطلاق، باب الرجل يزني بأم امرأته، وابنتها، وأختها، ج:7، ص:200، برقم:12776، ط:المجلس العلمي، هند)
اسی طرح عبد اللہ بن مسعود رضی اللہ تعالیٰ عنہ سے مروی ہے کہ جو شخص کسی عورت کی شرم گاہ دیکھے اور اسی کی بیٹی کی بھی شرم گاہ دیکھے تو اللہ تعالی اس کی طرف(ناراضگی کی وجہ) سے نہیں دیکھیں گے۔
"عن علقمة، عن عبد الله، قال: «لاينظر الله إلى رجل نظر إلى فرج امرأة وابنتها".
(مصنف ابن أبي شيبة ، کتاب النکاح، باب الرجل يقع على أم امرأته أو ابنة امرأته ما حال امرأته، ج:3، ص:480، برقم:16234، ط: مکتبة الرشد، ریاض)
اس کے علاوہ دیگر اثار صحابہ وتابعین سے اس کی تائید ہوتی ہے، ملاحظہ ہو:
موطأ مالک میں ہے:
"حدثني يحيى، عن مالك أنه بلغه، أن عمر بن الخطاب وهب لابنه جاريةً، فقال: «لاتمسها، فإني قد كشفتها»، وحدثني عن مالك، عن عبد الرحمن بن المجبر، أنه قال: وهب سالم بن عبد الله لابنه جارية، فقال: «لاتقربها؛ فإني قد أردتها فلم أنشط إليها».
وحدثني عن مالك، عن يحيى بن سعيد، أن أبا نهشل بن الأسود قال للقاسم بن محمد: " إني رأيت جاريةً لي منكشفاً عنها، وهي في القمر فجلست منها مجلس الرجل من امرأته، فقالت: إني حائض فقمت، فلم أقربها بعد، أفأهبها لابني يطؤها؟ فنهاه القاسم عن ذلك".
(کتاب النکاح، باب النهي عن أن يصيب الرجل أمة كانت لأبيه، ج:2، ص:539، ط: دار احیاء التراث العربی، بیروت لبنان)
مصنف ابن أبی شیبہ میں ہے:
" عن قيس بن سعد، عن مجاهد، قال: «إذا قبلها أو لمسها أو نظر إلى فرجها حرمت عليه ابنتها»".
(کتاب النکاح، باب ما قالوا في الرجل يقبل المرأة، تحل له ابنتها،الخ، ج:4، ص:10، برقم:17266، ط: مکتبة الرشد، ریاض)
مصنف عبد الرزاق میں ہے:
" عن معمر، عن ابن طاوس، عن أبيه قال: «إذا نظر الرجل في فرج امرأة من شهوة لا تحل لابنه ولا لأبيه» ۔۔۔ عن أبي حنيفة، عن حماد، عن إبراهيم قال: «إذا قبل الرجل المرأة من شهوة، أو مسها، أو نظر إلى فرجها لم تحل لأبيه، ولا لابنه»".
( کتاب النکاح، باب :وربائبکم، ج:6، ص:278، برقم:10831، ط:المجلس العلمی، ہند)
وفيه أيضاً:
" أخبرنا ابن جريج قال: سمعت عطاء يقول: «إن زنى بأم امرأته أو ابنتها، حرمتا عليه جميعاً»".
(کتاب الطلاق، باب الرجل يزني بأم امرأته، وابنتها، وأختها ، ج:7، ص:198، برقم:12762، ط:المجلس العلمي، هند)
وفيه أيضاً:
"عن الشعبي، وعن عمرو، عن الحسن قالا: «إذا زنى الرجل بأم امرأته أو ابنة امرأته، حرمتا عليه جميعاً»".
(کتاب الطلاق، باب الرجل يزني بأم امرأته، وابنتها، وأختها ، ج:7، ص:198، برقم:12763، ط:المجلس العلمي، هند)
مصنف ابن أبی شیبہ میں ہے:
"عن إبراهيم، وعامر، في رجل وقع على ابنة امرأته قالا: «حرمتا عليه كلاهما» وقال إبراهيم: «وكانوا يقولون: إذا اطلع الرجل على المرأة، على ما لا تحل له، أو لمسها لشهوة، فقد حرمتا عليه جميعاً»".
(کتاب النکاح، باب الرجل يقع على أم امرأته أو ابنة امرأته ما حال امرأته، ج:3، ص:481، برقم:16236، ط: مکتبة الرشد، ریاض)
وفیہ ایضاً:
"عن مغيرة، عن إبراهيم، قال: «إذا قبل الأمة لم تحل له ابنتها، وإذا قبل ابنتها لم تحل له أمها»".
(کتاب النکاح، باب ما قالوا في الرجل يقبل المرأة، تحل له ابنتها،الخ، ج:4، ص:11، برقم:17267، ط: مکتبة الرشد، ریاض)
المبسوط للسرخسی میں ہے:
"فنقول: كما ثبتت حرمة المصاهرة بالوطء تثبت بالمس والتقبيل عن شهوة عندنا سواء كان في الملك أو في غير الملك، وعند الشافعي - رحمه الله تعالى - لاتثبت الحرمة بالتقبيل والمس عن شهوة أصلاً في الملك أو في غير الملك حتى إنه لو قبل أمته، ثم أراد أن يتزوج ابنتها عنده يجوز. وكذلك لو تزوج امرأة وقبلها بشهوة، ثم ماتت عنده يجوز له أن يتزوج ابنتها بناءً على أصله أن حرمة المصاهرة تثبت بما يؤثر في إثبات النسب والعدة، وليس للمس والتقبيل عن شهوة تأثير في إثبات النسب والعدة، فكذلك في إثبات الحرمة وقاس بالنكاح الفاسد، فإن التقبيل والمس فيه لا يجعل كالدخول في إيجاب المهر والعدة، وكذلك في إيجاب الحل للزوج الأول، فكذا هنا، ولكنا نستدل بآثار الصحابة - رضي الله عنهم -، فقد روي عن ابن عمر - رضي الله عنه - أنه قال: إذا جامع الرجل المرأة أو قبلها بشهوة أو لمسها بشهوة أو نظر إلى فرجها بشهوة حرمت على أبيه وابنه وحرمت عليه أمها وابنتها. وعن مسروق - رحمه الله تعالى - قال: بيعوا جاريتي هذه أما إني لم أصب منها ما يحرمها على ولدي من المس والقبلة، ولأن المس والتقبيل سبب يتوصل به إلى الوطء، فإنه من دواعيه ومقدماته فيقام مقامه في إثبات الحرمة كما أن النكاح الذي هو سبب الوطء شرعاً يقام مقامه في إثبات الحرمة إلا فيما استثناه الشرع وهي الربيبة، وهذا لأن الحرمة تنبني الأحكام كما تقام شبهة البعضية بسبب الرضاع مقام حقيقة البعضية في إثبات الحرمة دون سائر الأحكام، ولو نظر إلى فرجها بشهوة تثبت به الحرمة عندنا استحساناً، وفي القياس لاتثبت، وهو قول ابن أبي ليلى والشافعي - رحمهما الله تعالى - لأن النظر كالتفكر؛ إذ هو غير متصل بها".
( کتاب النکاح، ج:4، ص:207، ط: دارالمعرفہ)
فتح القدیر میں ہے:
"وبقولنا قال مالك في رواية وأحمد خلافاً للشافعي ومالك في أخرى، وقولنا قول عمر وابن مسعود وابن عباس في الأصح وعمران بن الحصين وجابر وأبيّ وعائشة وجمهور التابعين كالبصري والشعبي والنخعي والأوزاعي وطاوس وعطاء ومجاهد وسعيد بن المسيب وسليمان بن يسار وحماد والثوري وإسحاق بن راهويه".
(کتاب النکاح، فصل في بیان المحرمات، ج:3، ص:219، ط: دار الفکر)
فتاوی شامی میں ہے:
" (قوله: مصاهرةً) كفروع نسائه المدخول بهن، وإن نزلن، وأمهات الزوجات وجداتهن بعقد صحيح، وإن علون، وإن لم يدخل بالزوجات وتحرم موطوءات آبائه وأجداده، وإن علوا ولو بزنى والمعقودات لهم عليهن بعقد صحيح، وموطوءات أبنائه وآباء أولاده، وإن سفلوا ولو بزنى والمعقودات لهم عليهن بعقد صحيح فتح، وكذا المقبلات أو الملموسات بشهوة لأصوله أو فروعه أو من قبل أو لمس أصولهن أو فروعهن".
(کتاب النکاح، فصل فی المحرمات، ج:3، ص:28، ط: سعید)
قرآن وسنت کی نصوص اور فقہاءِ کرام کی عبارات سے ثابت ہوا کہ حرمتِ مصاہرت نکاح، زنا، اور شہوت کے ساتھ چھونے اور شہوت کے ساتھ شرم گاہ کے داخلی حصے کو دیکھنے سے ثابت ہوجاتی ہے، حرمتِ مصاہرت کے ان چار اسباب میں سے بعض، ائمہ متبوعین کے درمیان متفق علیہ ہیں اور بعض مختلف فیہ ہیں:
(1) نکاحِ صحیح:اس کے بعد بالاتفاق حرمتِ مصاہرت ثابت ہوجاتی ہے۔
(2) وطی: نکاحِ صحیح کے بعد وطی سے بالاتفاق حرمت ثابت ہوجاتی ہے، نکاحِ فاسد وباطل کے بعد وطی سے بھی بالاتفاق حرمت ثابت ہوجاتی ہے اور زنا یعنی نکاح کے عقد کے بغیر کسی عورت سے وطی کی تو اس سے بھی احناف اور حنابلہ کے نزدیک حرمتِ مصاہرت ثابت ہوجاتی ہے، ایک روایت مالکیہ کی بھی اسی طرح ہے، اور شوافع اور مالکیہ کے معتمد قول کے مطابق زنا سے حرمت ثابت نہیں ہوتی۔
(3، 4) لمس ونظر:شہوت کے ساتھ چھونے اور شہوت کے ساتھ شرم گاہ کے داخلی حصے کو دیکھنے سے احناف کے نزدیک حرمتِ مصاہرت ثابت ہوجاتی ہے۔
گویا عقدِ نکاح کے علاوہ دیگر اسباب کے ذریعے حرمتِ مصاہرت کا ثبوت مجتہد فیہ مسئلہ ہے، اب اس مجتہد فیہ مسئلہ میں کیا احناف کے مسلک پر عمل کرنا واقعۃً دشوار ہے ؟ یا اس پر عمل کی صورت میں عوام الناس کو شدید مشکلات کا سامنا ہوتا ہے اور عمومِ بلوی کی کیفیت پیدا ہوگئی ہے؟اور کیا ضرورت اس درجہ کی شدید ہے کہ اس مسئلہ میں مذہبِ غیر پر فتوی ٰ دیا جائے؟ تو ان تمام سوالات کے جوابات سے پہلے مناسب یہ ہے کہ یہ واضح ہونا چاہیے کہ احناف کے نزدیک مذکورہ اسباب کے ذریعے حرمتِ مصاہرت کا ثبوت مطلقاً ہے یا اس کی کچھ شرائط بھی ہیں، ان تمام شرائط کی وضاحت کے بعد یہ معلوم کرنا آسان ہوگا کہ ضرورت کس حد تک ہے۔
لہذا حرمتِ مصاہرت کے تمام اسباب کی الگ الگ شرائط ذیل میں ذکر کی جاتی ہیں:
1) مس بغیر حائل کے ہو یعنی درمیان میں کوئی کپڑا وغیرہ نہ ہو، یا درمیان میں حائل اس قدر باریک ہو کہ اس سے جسم کی حرارت پہنچتی ہو۔ وہ بال جو سر سے نیچے لٹکے ہوئے ہوئے ہیں ان کو چھونے سے حرمتِ مصاہرت ثابت نہیں ہوگی، بلکہ صرف ان بالوں کو چھونے سے حرمت ثابت ہوگی جو سر سے ملے ہوئے ہیں ۔
2) چھوتے وقت جانبین میں یا کسی ایک میں شہوت پیدا ہو، مرد کے لیے شہوت کا معیار یہ ہے کہ اس کے آلہ تناسل میں انتشار پیدا ہوجائے، اور اگر آلہ تناسل پہلے سے منتشر ہو تو اس میں اضافہ ہوجائے، اور بیمار اور بوڑھے مرد جن کو انتشار نہیں ہوتا اور عورتوں کے لیے شہوت کا معیار یہ ہے کہ دل میں ہیجان کی کیفیت پیدا ہو اور دل کو لذت حاصل ہو،اور دل کا ہیجان پہلے سے ہوتو اس میں اضافہ ہوجائے۔
3) شہوت چھونے کے ساتھ ملی ہوئی ہو ، اگر چھوتے وقت شہوت پیدا نہ ہو، پھر بعد میں شہوت پیدا ہوتو اس کا اعتبار نہیں ہے،اس سے حرمتِ مصاہرت ثابت نہیں ہوگی۔
4) شہوت تھمنے سے پہلے انزال نہ ہوگیا ہو، اگر انزال ہوگیا تو حرمتِ مصاہرت ثابت نہیں ہوگی۔
5) عورت کی عمر کم از کم نو سال اور مرد کی عمر کم ازکم بارہ سال ہو۔
6) اگر چھونے والی عورت ہے اور وہ شہوت کا دعوی کرے یا چھونے والا مرد ہے اور وہ شہوت کا دعوی کرےتو شوہر کو اس خبر کے سچے ہونے کا غالب گمان ہو، اس لیے اس دعوی سے شوہر کا حق باطل ہوتاہے ،اس لیے صرف دعوی کافی نہیں، بلکہ شوہر کو ظن غالب حاصل ہونا یا شرعی گواہوں کا ہونا ضروری ہے۔
7) جس کو چھوا جارہا ہو وہ زندہ ہو۔
ایک اور اہم شرط چھونے اور دیکھنے سے حرمتِ مصاہرت ثابت ہونے کے لیے مشترک یہ ہے کہ شہوت اسی کے لیے پیدا ہوئی ہو یعنی شہوت کا ہدف وہی مرد یا عورت ہو، اگر شہوت پہلے سے تھی اور اسی حالت میں اس نے صنفِ مخالف کو ہاتھ لگایا یا اس کی شرم گاہ کو دیکھا اور اس سے شہوت میں کوئی اضافہ نہیں ہوا تو اس سے حرمتِ مصاہرت ثابت نہیں ہوگی۔
حاصل یہ ہے کہ حرمتِ مصاہرت ثابت ہونے کے لیے حنفیہ کے نزدیک مندرجہ بالا شرائط کا پایا جانا ضروری ہے، اگر یہ شرطیں نہیں پائی جائیں گی تو حرمتِ مصاہرت ثابت نہیں ہوگی۔
اب اگر ان شرائط پر غور کیا جائے تو یہ بات واضح ہوجاتی ہے کہ احناف مصاہرت کے باب میں زیادہ محتاط ہیں؛ تاکہ فتنہ وفساد برپا نہ ہو اور معاشرہ پاک وصاف ہو، عام طور پر روز مرہ کے جن مسائل کا حوالہ دے کر مذہبِ حنفی سے عدول کرنے کا کہا جاتا ہے تو اکثر و بیشتر ان میں یہ تمام شرائط پوری نہیں ہوتیں، اور جہاں حرمتِ مصاہرت کی شرائط پوری ہوجاتی ہیں تویہ عام طور پر وہاں ہوتا ہے جہاں مرد وزن کا اختلاط اور انتہائی درجہ کا بے تکلفانہ ماحول ہو، اور ایسی مغربی تہذیب سے متاثرہ افراد کی خود ساختہ ضرورت کی شرعاً کوئی حیثیت بھی نہیں، چہ جائے کہ اسے ضرورتِ شدیدہ یا اضطرار کا درجہ دیا جائے اور اس کے لیے رخصتیں تلاش کی جائیں۔
عموماً جن مسائل کا حوالہ دیا جاتا ہے ان میں سے ایک یہ ہے کہ کسی تیسرے شخص نے میاں بیوی میں سے کسی کو شہوت کے ساتھ دیکھا، مثلاً سسر نے اپنی بہو کو دیکھ لیا تو جس طرح پیچھے شرائط میں ذکر ہوا کہ دیکھنے سے حرمتِ مصاہرت تب ثابت ہوگی جب فرجِ داخل میں دیکھا ہو اور دیکھنے کی دیگر شرائط بھی پائی جائیں اور یہ عام حالات میں ہوتا نہیں ہے، بلکہ اس کے لیے ضروری ہے کہ عورت دیوار سے ٹیک لگا کر بیٹھی ہو یا کوئی اور حالت ٹیک لگا نے کی طرح ہو، اس کے علاوہ اگر شرم گاہ کے خارجی حصہ کی طرف دیکھا ہو تب بھی حرمت ثابت نہیں ہوتی، اور اس کا تحقق ہمارے معاشرے میں کس حد تک ہے اور کس درجہ کا اس میں ابتلا ہے ، یہ کسی ذی شعور پر مخفی نہیں ، لہذا اسے ضرورت کا درجہ نہیں دیا جاسکتا۔
ایک اور مسئلہ جس کا عام طور پر حوالہ دیا جاتا ہے کہ باپ نے غلطی سے بیٹی کو بیوی سمجھ کر ہاتھ لگالیا، تو اس کے بارے میں یہ تفصیل شرائط میں گزری ہے، ایک تو یہ کہ وہ مس بلا حائل ہو، دوسری بات یہ کہ اسی وقت شہوت پیدا ہوئی ہو ، بعد کی شہوت کا اعتبار نہیں ہے، اور ایک یہ کہ شہوت کا ہدف وہی ہو، اگر پہلے سے شہوت موجود ہو اس دوران ہاتھ لگایا اور شہوت میں مزید اضافہ نہ ہو تب بھی حرمتِ مصاہرت ثابت نہیں ہوگی، اور یہ بات کسی سے مخفی نہیں کہ عمومی طور پر غلطی سے یہ واقعہ ہونے میں یہ سب شرائط پایا جانا ایک مشکل امر ہے، اور جہاں یہ سب پایا جائے وہ اکا دکا واقعات ہیں جنہیں اجتماعی ضرورت کا درجہ نہیں دیا جاسکتا، اسی طرح باقی واقعات کو بھی قیاس کیا جاسکتا ہے۔
سب سے اہم بات یہ ہے کہ اگر یوں مصاہرت کے باب میں مذہبِ غیر پر عمل کا عمومی فتوی دے دیا جائے تو بے حیائی اور بے راہ روی کا ایک دروازہ کھل جائے گا اور یہ گویا غیر اقوام کی تہذیب سے متاثرہ اذہان کو کھلی چھوٹ دے دینے کے مترادف ہے، اس سے معاشرہ میں مزید مفاسد جنم لیں گے، اب تو پھر بھی حرمتِ مصاہرت کے ثابت ہونے کے خوف سے لوگ اس قبیح فعل سے بچتے ہیں ، جب اس طرح کی رخصت انہیں نظر آئیں گی تو پھر اس طرح کے فعل پر وہ جری ہوجائیں گے، یہ برائی اور خرابی اکّا دکّا مواقع پر حرمتِ مصاہرت ثابت ہونے کے نتیجے میں پیدا ہونے والے مفاسد سے کہیں بڑھ کر ہے، اور یوں پھر ہر ہر مسئلہ میں لوگوں کی خود ساختہ ضرورتوں کو لحاظ رکھتے ہوئے گنجائش کے راستے نکالے جائیں تو شریعت ایک کھیل بن کر رہ جائے گی جس کی کسی صورت میں اجازت نہیں ہے۔
حضرت مولانا مفتی عبدالرحیم لاجپوری رحمہ اللہ اسی طرح کے ایک مسئلہ کے جواب میں تحریر فرماتے ہیں :
”(سوال ۲۴۷): ایک شخص نے اپنی ساس سے زنا کرلیا ، اس شخص کو اپنے فعل پر ازحد ندامت ہے، لیکن حرمتِ مصاہرت کا مسئلہ ا س کے لیے باعثِ تشویش بنا ہوا ہے کہ اب وہ کیا کرے ؟ ازروئے شرع اس کی بیوی اس پرحرام ہوچکی، اگر وہ اس صورت میں اپنے فعل کو بیوی سے چھپائے ہوئے طلاق دے کر جدا کرتا ہے تو طلاق دینے کی وجہ سے سسرال والوں کی طرف سے جان کا خطرہ ہے، سسرال والے دولت وقوت میں فائق ہونے کے ساتھ ساتھ غنڈے بھی ہیں، اس علاقہ کے تمام لوگ یہ بات جانتے ہیں اور ان لوگوں سے خائف رہتے ہیں، نیز اگر وہ شخص اپنے اس برے فعل کااظہار کرتا ہے تو اس صورت میں بھی جان کا خطرہ ہے تو مذکورہ صورت میں اختلاف امتی رحمۃ کے پیش نظر امام شافعی ؒ کے مسلک پر (کہ زنا سے حرمتِ مصاحرت ثابت نہیں ہوتی) عمل کرے تو جائز ہوگایا نہیں؟ بینواتوجروا۔
(الجواب):فتح القدیر میں ایک حدیث ہے: "قال رجل: یارسول اﷲ اني زینت با مرأة في الجاهلیة، أفأنکح ابنتها؟ قال : لا أری ذلک، ولایصلح أن تنکح امرأة تطلع من ابنتها علی ماتطلع علیه منها". الخ (فتح القدیر ج۳ ص ۲۲۱ فصل في بیان المحرمات تحت قوله: لأنها نعمة ) اس حدیث سے ثابت ہوتا ہے کہ کوئی شخص کسی عورت سے زنا کرے تو اس کی بیٹی اس پرحرام ہے،ہدایہ اولین میں ہے : "ومن زنی با مرأة حرمت علیه أمها وبنتها". (هدایه أولین ص ۲۸۹)فتاویٰ تاتارخانیہ میں ہے: "حرمة الصهر تثبت بالعقد الجائز وبالوطئ حلالاً کان أو حراماً أو عن شبهة أو زناً". (الفتاویٰ التاتارخانیة ج۲ ص۶۱۸ الفصل السابع في أسباب التحریم)
صورتِ مسئولہ میں ساس سے زنا کیا ہے تو حرمتِ مصاہرت ثابت ہوگئی اور بیوی اس پر حرام ہوگئی، اب شوہر بیوی کو طلاق دے کر علیٰحدہ کر دے ،مذکورہ صورت میں امام ابو حنیفہ ؒ کا مسلک چھوڑ کر امام شافعی ؒ کا مسلک اختیار کرنے کی اجازت نہیں دی جاسکتی، جہاں مسلمانوں کی کوئی شدید اجتماعی ضرورت داعی ہو (بالفاظِ دیگر عمومِ بلویٰ ہو ) تو ایسے موقع پر کسی خاص مسئلہ میں کسی دوسرے امام کے قول پر عمل کرنے کی گنجائش ہوسکتی ہے بشرط یہ کہ متبحر علماء اس کا فیصلہ کریں، انفرادی رائے کا کوئی اعتبار نہیں،انفرادی ضرورت کی وجہ سے مذہبِ غیر کو اختیار کرنے کی اجازت نہیں دی جاسکتی اور خاص کر عورت کی خاطر مذہبِ حق کو چھوڑنا بڑا خطرناک ہے اور اس سے سوءِ خاتمہ کا اندیشہ ہے، شامی میں ہے ، ایک حنفی المسلک نے اہلِ حدیث(غیر مقلد) کی لڑکی سے نکاح کا پیغام بھیجا ، اس نے کہا: اگر تو اپنا مذہب چھوڑ دے ،یعنی امام کے پیچھے قراء ت اور رفعِ یدین کرے تو پیغام منظور رہے، اس حنفی المسلک نے شرط قبول کرلی اور نکاح ہوگیا ، شیخِ وقت امام ابو بکر جو زجانی رحمہ ﷲ نے یہ سنا تو افسوس کیا اور فرمایا:
"النکاح جائز ولکن أخاف علیه أن یذهب ایمانه وقت النزع؛ لأنه استخف بالمذهب الذي هو حق عنده وترکه لأجل جیفة منتة".
یعنی نکاح تو جائز ہے لیکن مجھے اس شخص کے سوءِ خاتمہ کا اندیشہ ہے کہ اس نے ایک عورت کی خاطر اس مذہب کی توہین کی جسے وہ آج تک حق سمجھتا تھا۔ محض عورت کی خاطر اسے چھوڑ دیا"۔(شامی ص ۲۶۳ ج۳، باب التعزیر مطلب فیما اذا ارتحل الی مذہب غیرہ)مذکورہ صورت میں اختلاف امتی رحمۃ سے استدلال صحیح نہیں ، جان کا خطرہ ہوتو وہ جگہ چھوڑ دے ، لوگ معمولی باتوں کی وجہ سے اپنا وطن چھوڑ دیتے ہیں ،فقط وﷲ اعلم بالصواب ۔“
(فتاوی رحیمیہ، محرمات کا بیان، ج:8، ص:211، ط:دارالاشاعت)
رہی بات اس کی کہ لوگ مسئلے کی وجہ سے وہمی ہوتے جارہے ہیں ، ایک تو وہم اور شک سے حرمتِ مصاہرت ثابت نہیں ہوتی، دوسری یہ کہ چھونے سے حرمتِ مصاہرت کے ثبوت کے لیے احناف نے جو شرائط رکھی ہے اگر اس میں غور کیا جائے تو کوئی بھی وہم کا شکار نہیں ہوگا۔
اور یہ کہنا کہ "حرمتِ مصاہرت میں دواعی وطی کو وطی کا قائم مقام شمار کیا جاتا ہے، تو دواعی وطی کی وجہ سے زنا کی حد کیوں نہیں لگائی جاتی؟"درست نہیں ہے؛ کیوں حرمت کے باب میں احتیاط اسی میں ہے کہ دواعی وطی سے بھی حرمت ثابت ہواور حدود کے باب میں احتیاط اسی میں ہے کہ جب تک کامل زنا سرزد نہ ہو تو اس وقت تک حد نہ لگائی جائے، اور یہ کہنا کہ" لوگ مریض ہوگئے ہیں ،لہذا نرمی کی راہ اختیار کرنی چاہیے"درست نہیں ہے؛ کیوں کہ جو شرائط احناف نے رکھے ہیں اگر ان میں غور کیا جائے تو معلوم ہوجائے گا کہ جتنی نرمی کرنی چاہیے تھی وہ کی جاچکی ہے۔
خلاصہ بحث یہ ہے کہ حرمتِ مصاہرت کے باب میں مذہبِ غیر پر فتوی دینا جائز نہیں ہے، خواہ کسی بھی سبب سے حرمت ثابت ہو، اور نکاح سے پہلے حرمت ثابت ہویا نکاح کے بعد ہو، بلکہ اس کا حل یہ ہے کہ علماءِ کرام ومفتیانِ کرام عوام الناس کے سامنے اس مسئلہ کو اجاگر کریں اور انہیں اسلامی تہذیب سے آشنا کریں، اور اس بے حیائی کے نتیجے میں پیدا ہونے والی خرابیوں سے آگاہ کریں؛ تاکہ معاشرہ ان برائیوں سے پاک صاف ہو۔
حوالہ جات ملاحظہ ہوں :
الفقہ علی المذاهب الأربعہ میں ہے:
"الحنفية - قالوا: إن حرمة المصاهرة تثبت بواحد من الأمور الآتية وهي:- 1 - العقد الصحيح، - 2 - الوطء الحلال، - 3 - الوطء بالنكاح الفاسد، وكذا الوطء بشبهة.4 - اللمس بينهما بشهوة.- 5 - النظر إلى فرج المرأہ بشهوة، ولا يثبت بالنظر إلى سائر الأعضاء، أو الشعر ولو بشهوة.- 6 - وتثبت الحرمة بالزنا، أو اللمس، أو النظر بشهوة بدون نكاح، والمراد بالشهوة هو، يشتهي بقلبه، ويعرف ذلك بإقراره، وقيل: يصحب ذلك تحرك الآلة وانتشارها ۔۔۔۔۔۔ الحنابلة - قالوا: إن الوطء الحرام كالوطء الحلال كلاهما تثبت به حرمة المصاهرة، فمن زنى بامرأة حرمت على أبويه، وحرمت عليه أمها وبناتها، ولو وطئ أم امرأته حرمت عليه ابنتها، ووجب مفارقتا، وكذلك لو وطئ بنت زوجته حرمت عليه أمها (وهي زوجته) وقالوا: بحرمة نكاح الرجل ابنته من الزنا مثل الحنفية."
(کتاب الحدود ، التحریم بالمصاہرۃ، ج:5، ص:101، ط: مکتبۃ الصفا)
المبسوط للسرخسی میں ہے:
" فنقول: كما ثبتت حرمة المصاهرة بالوطء تثبت بالمس والتقبيل عن شهوة عندنا سواء كان في الملك أو في غير الملك، ... ولكنا نستدل بآثار الصحابة - رضي الله عنهم -، فقد روي عن ابن عمر - رضي الله عنه - أنه قال: إذا جامع الرجل المرأة أو قبلها بشهوة أو لمسها بشهوة أو نظر إلى فرجها بشهوة حرمت على أبيه وابنه وحرمت عليه أمها وابنتها. وعن مسروق - رحمه الله تعالى - قال: بيعوا جاريتي هذه أما إني لم أصب منها ما يحرمها على ولدي من المس والقبلة، ولأن المس والتقبيل سبب يتوصل به إلى الوطء فإنه من دواعيه ومقدماته فيقام مقامه في إثبات الحرمة كما أن النكاح الذي هو سبب الوطء شرعا يقام مقامه في إثبات الحرمة إلا فيما استثناه الشرع وهي الربيبة، وهذا لأن الحرمة تنبني على الاحتياط فيقام السبب الداعي فيه مقام الوطء احتياطا، وإن لم يثبت به سائر الأحكام كما تقام شبهة البعضية بسبب الرضاع مقام حقيقة البعضية في إثبات الحرمة دون سائر الأحكام، ولو نظر إلى فرجها بشهوة تثبت به الحرمة عندنا استحسانا، وفي القياس لا تثبت، وهو قول ابن أبي ليلى والشافعي - رحمهما الله تعالى - لأن النظر كالتفكر؛ إذ هو غير متصل بها. ألا ترى أنه لا يفسد به الصوم، وإن اتصل به الإنزال، ولأن النظر لو كان موجبا للحرمة لاستوى فيه النظر إلى الفرج وغيره كالمس عن شهوة، ولكنا تركنا القياس بحديث أم هانئ - رضي الله تعالى عنها - أن النبي - صلى الله عليه وسلم - قال: «من نظر إلى فرج امرأة بشهوة حرمت عليه أمها وابنتها» وعن عمر - رضي الله تعالى عنه - أنه جرد جارية، ثم نظر إليها، ثم استوهبها منه بعض بنيه، فقال: أما إنها لا تحل لك، وفي الحديث «ملعون من نظر إلى فرج امرأة وابنتها»، ثم النظر إلى الفرج بشهوة نوع استمتاع؛ لأن النظر إلى المحل إما لجمال المحل أو للاستمتاع، وليس في ذلك الموضع جمال ليكون النظر لمعنى الجمال فعرفنا أنه نوع استمتاع كالمس بخلاف النظر إلى سائر الأعضاء، ولأن النظر إلى الفرج لا يحل إلا في الملك بمنزلة المس عن شهوة بخلاف النظر إلى سائر الأعضاء، ثم معنى الشهوة المعتبرة في المس والنظر أن تنتشر به الآلة أو يزداد انتشارها، فأما مجرد الاشتهاء بالقلب غير معتبر.ألا ترى أن هذا القدر يكون من الشيخ الكبير الذي لا شهوة له، والنظر إلى الفرج الذي تتعلق به الحرمة هو النظر إلى الفرج الداخل دون الخارج، وإنما يكون ذلك إذا كانت متكئة أما إذا كانت قاعدة مستوية أو قائمة لا تثبت الحرمة بالنظر."
(کتاب النکاح، ج:4، ص:204، ط: دارالمعرفة، بیروت)
البحر الرائق میں ہے:
"(قوله: والزنا واللمس والنظر بشهوة يوجب حرمة المصاهرة) وقال الشافعي الزنا لا يوجب حرمة المصاهرة؛ لأنها نعمة فلا تنال بالمحظور، ولنا: أن الوطء سبب الجزئية بواسطة الولد حتى يضاف إلى كل واحد منهما كملا فيصير أصولها وفروعها كأصوله وفروعه، وكذلك على العكس والاستمتاع بالجزء حرام إلا في موضع الضرورة وهي الموطوءة والوطء محرم من حيث إنه سبب الولد لا من حيث إنه زنا واللمس والنظر سبب داع إلى الوطء فيقام مقامه في موضع الاحتياط كذا في الهداية ولم يستدل بقوله تعالى {ولا تنكحوا ما نكح آباؤكم} [النساء: 22] كما فعل الشارحون لما قدمنا أنه لا يصلح الاستدلال به، أراد بالزنا الوطء الحرام، وإنما قيد به؛ لأنه محل الخلاف، أما لو وطئ المنكوحة نكاحا فاسدا أو المشتراة فاسدا أو الجارية المشتركة أو المكاتبة أو المظاهرة منها أو الأمة المجوسية أو زوجته الحائض أو النفساء أو كان محرما أو صائما فإنه يثبت حرمة المصاهرة اتفاقا وبه علم أن الاعتبار لعين الوطء لا لكونه حلالا أو حراما وليفيد أنه لا بد أن تكون المرأة حية؛ لأنه لو وطئ الميتة فإنه لا تثبت حرمة المصاهرة كما في الخانية".
(کتاب النکاح،فصل فی المحرمات، ج:3، ص:105، ط:دارالکتاب الاسلامی)
فتاوی شامی میں ہے:
"(و) حرم المصاهرة (بنت زوجته الموطوءة وأم زوجته) وجداتها مطلقاً بمجرد العقد الصحيح (وإن لم توطأ) الزوجة.
(قوله: الصحيح) احتراز عن النكاح الفاسد، فإنه لا يوجب بمجرده حرمة المصاهرة بل بالوطء أو ما يقوم مقامه من المس بشهوة والنظر بشهوة؛ لأن الإضافة لا تثبت إلا بالعقد الصحيح بحر".
( کتاب النکاح، فصل فی المحرمات، ج:3، ص:30 ، ط: سعید)
وفیہ ایضاً:
"(و) حرم أيضاً بالصهرية (أصل مزنيته) أراد بالزنا في الوطء الحرام (و) أصل (ممسوسته بشهوة) ولو لشعر على الرأس بحائل لايمنع الحرارة.
(وأصل ماسته وناظرة إلى ذكره والمنظور إلى فرجها) المدور (الداخل) ولو نظره من زجاج أو ماء هي فيه (وفروعهن) مطلقاً والعبرة للشهوة عند المس والنظر لا بعدهما وحدها فيهما تحرك آلته أو زيادته به يفتى وفي امرأة ونحو شيخ كبير تحرك قلبه أو زيادته وفي الجوهرة: لا يشترط في النظر لفرج تحريك آلته به يفتى هذا إذا لم ينزل فلو أنزل مع مس أو نظر فلا حرمة به يفتي ابن كمال وغيره.
(قوله: بشهوة) أي ولو من أحدهما كما سيأتي (قوله: ولو لشعر على الرأس) خرج به المسترسل، وظاهر ما في الخانية ترجيح أن مس الشعر غير محرم وجزم في المحيط بخلافه ورجحه في البحر، وفصل في الخلاصة فخص التحريم بما على الرأس دون المسترسل وجزم به في الجوهرة وجعله في النهر محمل القولين وهو ظاهر فلذا جزم به في الشارح (قوله: بحائل لا يمنع الحرارة) أي ولو بحائل إلخ، فلو كان مانعا لا تثبت الحرمة، كذا في أكثر الكتب، ۔۔۔۔۔۔۔ (قوله: وأصل ماسته) أي بشهوة قال في الفتح: وثبوت الحرمة بلمسها مشروط بأن يصدقها، ويقع في أكبر رأيه صدقها وعلى هذا ينبغي أن يقال في مسه إياها لا تحرم على أبيه وابنه إلا أن يصدقاه أو يغلب على ظنهما صدقه، ثم رأيت عن أبي يوسف ما يفيد ذلك. اهـ. (قوله: وناظرة) أي بشهوة (قوله: والمنظور إلى فرجها) قيد بالفرج؛ لأن ظاهر الذخيرة وغيرها أنهم اتفقوا على أن النظر بشهوة إلى سائر أعضائها لا عبرة به ما عدا الفرج، وحينئذ فإطلاق الكنز في محل التقييد بحر. (قوله: المدور الداخل) اختاره في الهداية وصححه في المحيط والذخيرة: وفي الخانية وعليه الفتوى وفي الفتح، وهو ظاهر الرواية لأن هذا حكم تعلق بالفرج، والداخل فرج من كل وجه، والخارج فرج من وجه والاحتراز عن الخارج متعذر، فسقط اعتباره، ولا يتحقق ذلك إلا إذا كانت متكئة بحر فلو كانت قائمة أو جالسة غير مستندة لا تثبت الحرمة إسماعيل وقيل: تثبت بالنظر إلى منابت الشعر وقيل إلى الشق وصححه في الخلاصة بحر (قوله: أو ماء هي فيه) احتراز عما إذا كانت فوق الماء فرآه من الماء كما يأتي (قوله: وفروعهن) بالرفع عطفا على أصل مزنيته، وفيه تغليب المؤنث على الذكر بالنسبة إلى قوله وناظرة إلى ذكره (قوله: مطلقا) يرجع إلى الأصول والفروع أي، وإن علون، وإن سفلن ط (قوله: والعبرة إلخ) قال في الفتح: وقوله: بشهوة في موضع الحال، فيفيد اشتراط الشهوة حال المس، فلو مس بغير شهوة، ثم اشتهى عن ذلك المس لا تحرم عليه. اهـ.وكذلك في النظر كما في البحر، فلو اشتهى بعدما غض بصره لا تحرم.قلت: ويشترط وقوع الشهوة عليها لا على غيرها لما في الفيض لو نظر إلى فرج بنته بلا شهوة فتمنى جارية مثلها فوقعت له الشهوة على البنت تثبت الحرمة، وإن وقعت على من تمناها فلا. (قوله: وحدها فيهما) أي حد الشهوة في المس والنظر ح (قوله: أو زيادته) أي زيادة التحرك إن كان موجودا قبلهما."
( کتاب النکاح، فصل فی المحرمات، ج:3، ص:32، ط: سعید)
فقط والله أعلم
فتوی نمبر : 144506100700
دارالافتاء : جامعہ علوم اسلامیہ علامہ محمد یوسف بنوری ٹاؤن
