آرڈر پر بنوائی گئی الماری طے شدہ ناپ اور ساخت کے مطابق نہ ہو تو لینے سے انکار اور پیشگی رقم کی واپسی کا حکم
سوال
میں نے اپنی بیٹی کی شادی کے لیے محلے کے ایک کارخانے سے لوہے کی الماری بنوانے کا آرڈر دیا۔ ناپ، رنگ اور دروازوں کی تعداد لکھ کر دی اور آدھی قیمت پیشگی دے دی۔ الماری تیار ہوئی تو وہ کہی گئی ناپ سے تقریباً چھ انچ چھوٹی تھی، اور اندر کا ایک خانہ بھی نہیں تھا۔
میں نے لینے سے انکار کر دیا تو کارخانے والا کہتا ہے کہ اب یہ بن چکی ہے، لینی پڑے گی، ورنہ پیشگی رقم واپس نہیں ملے گی۔ ایسی صورت میں میرے لیے کیا حکم ہے؟
جواب
واضح رہے کہ کسی کاریگر یا کارخانے کو ناپ اور اوصاف بتا کر کوئی چیز بنوانا "استصناع" کہلاتا ہے۔ یہ بیع کی ایک قسم ہے۔
لہٰذا صورتِ مسئولہ میں اگر واقعۃً کارخانے والے نے الماری آپ کی لکھوائی ہوئی ناپ سے تقریباً چھ انچ چھوٹی بنائی ہے اور طے شدہ اندرونی خانہ بھی نہیں بنایا، تو آپ کو اختیار ہے: چاہیں تو یہ الماری لے لیں اور چاہیں تو لینے سے انکار کر دیں۔ کارخانے والے کو یہ حق نہیں کہ وہ آپ کو یہ الماری لینے پر مجبور کرے۔ آپ کے انکار کی صورت میں آپ کی دی ہوئی پوری پیشگی رقم آپ کو واپس کرنا کارخانے والے پر لازم ہے۔ اس رقم کو روک لینا یا ضبط کر لینا اس کے لیے جائز نہیں۔
السنن الکبریٰ للبیہقی میں ہے:
"عن أبي حرة الرقاشي، عن عمه، أن رسول الله صلى الله عليه وسلم قال: لا يحل مال امرئ مسلم إلا بطيب نفس منه."
ترجمہ:
حضرت ابو حرہ رقاشی اپنے چچا رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے ارشاد فرمایا: "کسی مسلمان شخص کا مال اس کی دلی رضامندی کے بغیر حلال نہیں۔"
(كتاب الغصب، باب من غصب لوحا فأدخله في سفينة أو بنى عليه جدارا، ج:6، ص:166، ط: دار الكتب العلمية)
بدائع الصنائع میں ہے:
"(وأما) حكم الاستصناع فحكمه في حق المستصنع - إذا أتى الصانع بالمستصنع على الصفة المشروطة - ثبوت ملك غير لازم في حقه حتى يثبت له خيار الرؤية إذا رآه، إن شاء أخذه وإن شاء تركه، وفي حق الصانع ثبوت ملك لازم إذا رآه المستصنع ورضي به، ولا خيار له، وهذا جواب ظاهر الرواية."
(كتاب البيوع، فصل في الشرائط التي ترجع إلى المسلم، ج:5، ص:210، ط: دار الكتب العلمية)
شرح المجلہ للأتاسی میں ہے:
"إذا انعقد الاستصناع فليس لأحد العاقدين الرجوع عنه وإذا لم يكن المصنوع على الأوصاف المطلوبة المبينة كان المستصنع مخيرا لفوات الوصف المرغوب فيه أما الصانع فلا خيار له مطلقا."
(رقم المادة: 392، الباب السابع في بيان أنواع البيع وأحكامه، الفصل الرابع في الاستصناع، ج:2، ص:406-407، ط: مكتبة إسلامية، كوئٹہ)
درر الحکام فی شرح مجلۃ الأحکام میں ہے:
"لا يجوز لأحد أن يأخذ مال أحد بلا سبب شرعي."
(المقالة الثانية في بيان القواعد الكلية الفقهية، المادة: 97، ج:1، ص:98، ط: دار الجيل)
وفیہ ایضاً:
"(المادة 392) وإذا انعقد الاستصناع؛ فليس لأحد العاقدين الرجوع وإذا لم يكن المصنوع على الأوصاف المطلوبة المبينة كان المستصنع مخيرا. الاستصناع بيع وليس وعدا مجردا."
(الكتاب الأول في البيوع، الباب السابع في بيان أنواع البيع وأحكامه، الفصل الرابع في بيان الاستصناع، ج:1، ص:424، ط: دار الجيل)
فقط واللہ اعلم
دارالافتاء — جامعہ علوم اسلامیہ علامہ محمد یوسف بنوری ٹاؤن

