ہندو پڑوسی کی طرف سے آنے والے پوجا کے پرساد کا حکم

واضح رہے کہ غیر مسلم پڑوسی کی طرف سے آنے والا عام کھانا، مٹھائی یا پھل، جس میں حرام کی آمیزش نہ ہو اور جسے ان کے معبودانِ باطلہ کے نام پر چڑھایا نہ گیا ہو، لینا اور کھانا جائز ہے، البتہ ان کے مذہبی تہوار کے موقع پر آئی ہوئی چیز سے اجتناب کرنا لازم ہے ۔ اور جو چیز بتوں یا دیوی دیوتاؤں کے نام پر چڑھائی گئی ہو وہ "ما أهل لغير الله" کے حکم میں ہے، اس کا کھانا، دوسروں کو کھلانا اور اس کی خرید و فروخت سب ناجائز ہے۔

لہٰذا صورتِ مسئولہ میں جب پڑوسی خود بتاتے ہیں کہ یہ مٹھائی، پھل اور ناریل کے لڈو پوجا کا پرساد ہیں، تو ان کا کھانا جائز نہیں، اور گھر کے بچوں کو کھلانا بھی جائز نہیں۔ یہ چیزیں قبول نہ کی جائیں اور نرمی و خوش اخلاقی کے ساتھ معذرت کر لی جائے۔ پوجا کے علاوہ عام پڑوسی ہونے کے تعلق سے وہ جو کھانے پینے کی چیزیں بھیجیں، ان کے لینے کی گنجائش ہے۔

قرآنِ کریم میں ہے:
﴿إِنَّمَا حَرَّمَ عَلَيْكُمُ الْمَيْتَةَ وَالدَّمَ وَلَحْمَ الْخِنْزِيرِ وَمَا أُهِلَّ بِهِ لِغَيْرِ اللَّهِ﴾

(سورۃ البقرۃ: 173)

ترجمہ:

 اللہ تعالیٰ نے تم پر صرف حرام کیا ہے مردار کو اور خون کو (جو بہتا ہو) اور خنزیر کے گوشت کو (اسی طرح اس کے سب اجزاء کو بھی) اور ایسے جانور کو جو (بقصدِ تقرب) غیر اللہ کے نامزد کر دیا گیا ہو۔ (بیان القرآن)

معارف القرآن میں ہے:
"یہاں ایک چوتھی صورت اور ہے جس کا تعلق حیوانات کے علاوہ دوسری چیزوں سے ہے، مثلاً مٹھائی، کھانا وغیرہ جن کو غیراللہ کے نام پر نذر (منت) کے طور سے ہندو لوگ بتوں پر اور جاہل مسلمان بزرگوں کے مزارات پر چڑھاتے ہیں، حضرات فقہاء نے اس کو بھی اشتراکِ علت یعنی تقرب الی غیراللہ کی وجہ سے "ما اہل لغیر اللہ" کے حکم میں قرار دے کر حرام کہا ہے، اور اس کے کھانے پینے دوسروں کو کھلانے اور بیچنے خریدنے سب کو حرام کہا ہے۔"

(سورۃ البقرۃ، ج:1، ص:424، ط: مکتبہ معارف القرآن کراچی)

البحر الرائق میں ہے:
"والنذر للمخلوق لا يجوز؛ لأنه عبادة والعبادة لا تكون للمخلوق."

(کتاب الصوم، باب الاعتکاف، ج:2، ص:321، ط: دار الکتاب الاسلامی)

فتاوی عالمگیری میں ہے:
"ولا بأس بطعام المجوس كله إلا الذبيحة، فإن ذبيحتهم حرام."

(کتاب الکراہیۃ، الباب الرابع عشر في أهل الذمة والأحكام التي تعود إليهم، ج:5، ص:347، ط: دار الفکر)

فتاوی شامی میں ہے:
"واعلم أن النذر الذي يقع للأموات من أكثر العوام وما يؤخذ من الدراهم والشمع والزيت ونحوها إلى ضرائح الأولياء الكرام تقربا إليهم فهو بالإجماع باطل وحرام."

(کتاب الصوم، باب ما یفسد الصوم وما لا یفسدہ، قبیل باب الاعتکاف، ج:2، ص:439، ط: سعید)

وفیہ ایضاً:
"(وكره إلباس الصبي ذهبا أو حريرا) فإن ما حرم لبسه وشربه حرم إلباسه وإشرابه."

(کتاب الحظر والإباحۃ، فصل في اللبس، ج:6، ص:362-363، ط: سعید)

وفیہ ایضاً:
"(و) جاز (عيادته) بالإجماع. (قوله وجاز عيادته) أي عيادة مسلم ذميا نصرانيا أو يهوديا، لأنه نوع بر في حقهم وما نهينا عن ذلك."

(کتاب الحظر والإباحۃ، فصل في البیع، ج:6، ص:388، ط: سعید)

امداد الفتاوی میں ہے:
"سوال: موسمِ گرما میں اکثر اہل ہنود جگہ جگہ پانی پلایا کرتے ہیں، اس کے متعلق ایسا سنا ہے کہ وہ پانی دیوتاؤں کے نام پر پلاتے ہیں، تو اس پانی کا مسلمان کو پینا جائز ہے نہیں؟ الجواب: اگر محقق ہوجاوے کہ دیوتاؤں کے نام کا ہے تو "ما اهل لغیر اللّٰه" کے حکم میں ہے، لہذا ناجائز ہے۔"

(کتاب الحظر والإباحۃ، کھانے پینے کی حلال وحرام، مباح و مکروہ چیزوں کا بیان، ج:4، ص:97، ط: ادارۃ المعارف کراچی)

کفایت المفتی میں ہے:
"غیر مسلم سے سوکھا دانہ، غلہ، آٹا وغیرہ لے کر کھانا پکانا اور کھانا جائز ہے، جب کہ غیر مسلم نے اپنی خوشی سے دیا ہے تو اس کو لینے اور کھانے میں کوئی قباحت نہیں۔"

(کتاب الحظر والإباحۃ، ج:9، ص:131، ط: دار الاشاعت)

فتاوی محمودیہ میں ہے:
"اور جو کھانا کچوری وغیرہ ہندو کسی اپنے ملنے والے مسلمان کو دیں اس کا نہ لینا بہتر ہے، لیکن اگر کسی مصلحت سے لے لیا تو شرعاً اس کھانے کو حرام نہ کہا جائے گا۔"

(کتاب الحظر والإباحۃ، باب الاکل والشرب، ج:18، ص:34، ط: ادارۃ الفاروق)

فتاوی رحیمیہ میں ہے:
"ہندو کی کتھا (بیان) وغیرہ کی شیرینی کھانا جائز ہے۔ مگر خلاف احتیاط ہے، ہاں اگر شیرینی دیوی/دیوتا وغیرہ وغیراللہ کی نذرونیاز کی قسم کی ہو تو کھانا حلال نہیں ہے۔"

(متفرقات حظر والاباحۃ، ج:10، ص:241، ط: دار الاشاعت)

فقط و اللہ اعلم