عرض یہ ہے کہ وراثت کا ایک مکان ہے جس کے آٹھ حصہ دار ہیں۔ تمام حصہ دار اس بات پر متفق ہوئے کہ اس مکان کو فروخت کر دیا جائے۔ یہ مکان مارکیٹ میں فروخت کے لیے لایا گیا مگر فروخت نہ ہو سکا۔

ان آٹھ حصہ داروں میں سے دو افراد نے کہا کہ اس مکان کو ہم دونوں خرید لیتے ہیں۔ ایک آدمی کے حصے میں تین افراد آئے اور اسی طرح دوسرے آدمی کے حصے میں تین افراد آئے۔ ان دونوں میں سے ایک آدمی نے اپنے حصے کے تین افراد کے حصے تقریباً ادا کر دیے، جبکہ دوسرے آدمی نے اپنے حصے کے تین افراد میں سے صرف ایک فرد کا حصہ ادا کیا۔ بقیہ دو افراد کے حصوں کی ادائیگی کی کوشش کی مگر ادائیگی نہ ہو سکی۔ اس بات کو تقریباً ڈیڑھ سال کا عرصہ گزر گیا۔

اب ڈیڑھ سال کے بعد ان دونوں حصہ داروں نے، جن کو اپنا حصہ نہیں ملا، کہا کہ ہمارا حصہ اسی گھر میں رہنے دو، ہم یہ گھر فروخت نہیں کرنا چاہتے۔ ابھی یہ فرد، جس کے ذمے بقیہ دو حصے ہیں، یہ کہتا ہے کہ بھائی! یہ مکان فروخت کر دو، تم اپنا اپنا حصہ لو اور میں اپنا حصہ لوں تاکہ میں نے جن لوگوں سے قرضہ لیا ہوا ہے، وہ ادا کر دوں۔ لیکن یہ دونوں کہتے ہیں کہ ہم وراثت کا یہ مکان فروخت نہیں کرتے۔

سوال نمبر 1: معلوم یہ کرنا ہے کہ جب مکان فروخت ہو گیا، قیمت بھی طے ہو گئی، چار حصہ داروں کو ادائیگی بھی ہو گئی اور دو حصے ان کے (جنہوں نے یہ مکان خریدا) یعنی کل چھ حصے نکل گئے، اب باقی جو دو حصے رہ گئے، وہ دونوں اپنے آپ کو اس مکان کا حصہ دار کہتے ہیں کیونکہ تم نے ابھی تک رقم ادا نہیں کی، اس لیے ہم اس مکان میں حصہ دار ہیں۔ کیا ان دونوں کا یہ کہنا درست ہے کہ ہم مکان میں حصہ دار ہیں؟

سوال نمبر 2: جن دو حصہ داروں کو ان کے حصے کی رقم نہیں ملی، اب ان کو جو حصہ دیا جائے گا، وہ ابھی کی موجودہ قیمت پر دیا جائے گا یا مکان فروخت کرتے وقت جو قیمت تھی (جو ڈیڑھ سال پہلے جن لوگوں کو رقم ادا کی گئی)، اس پر دیا جائے گا؟

سوال نمبر 3: ان دونوں حصہ داروں (جن کو حصے کی رقم نہیں ملی ہے) کا یہ کہنا ہے کہ "اب ہم یہ مکان فروخت نہیں کرنا چاہتے"، جبکہ چار حصہ داروں کو رقم کی ادائیگی کی جا چکی ہے اور دو خریدار، کل چھ افراد ہوئے۔ کیا ان دونوں کا اس طرح مکان کو فروخت کرنے سے روکنا جائز ہے؟ اور جس فرد کے ذمے ان دونوں حصہ داروں کی رقم کی ادائیگی ہے، وہ فرد ان دونوں حصہ داروں کا مقروض ہے یا یہ اس مکان میں حصہ دار ہیں؟

سوال نمبر 4: یہ مکان فروخت کرنے کے لیے تمام افراد تیار تھے کہ اس کو فروخت کر دیا جائے، اس بنا پر ان افراد کو رقم کی ادائیگی کی گئی۔ اب ان دو حصہ داروں میں سے ایک کا یہ کہنا ہے کہ "جب تم دونوں یہ مکان خرید رہے تھے تو تم لوگ میرے علم میں کیوں نہیں لائے کہ تم دونوں خرید رہے ہو؟" جبکہ اس حصہ دار کے علم میں یہ بات تھی کہ حصہ داروں کے حصے کی رقم کی ادائیگی ہو رہی ہے۔ اب اس کا یہ کہنا درست ہے؟