مروجہ چھ کلمے اور ان کی موجودہ ترتیب توقیفی یا منصوصی نہیں

1۔ ان چھ کلموں کو سنت کی ایک خاص یا لازمی ترتیب سجھنا درست نہیں ہے اور نہ ہی یہ اعتقاد رکھنا درست ہے کہ شریعت نے انہیں اسی طرح  چھ کی تعداد میں مقرر کیا ہے۔

2۔ ان کلموں کی موجودہ ترتیب  مخصوص نام اور تعداد  تعلیمی  و تدریسی مقاصد کے لیے مقرر کی گئی تھی، یہ  کوئی منصوصی یا توقیفی حکم نہیں  ہے۔

فتاوٰی دارالعلوم دیوبند میں ہے :

” الجواب: احادیث میں یہ کلمات اور ان کا ثواب وارد ہوا ہے، چونکہ مضمونِ توحید وایمان و اسلام ان میں ہے، اس وجہ سے علماء نے ان کا نام کلمات رکھا ، اول دوم وغیرہ یہ احادیث میں وارد نہیں ہے، یہ محض یاد کرنے کرانے کے لیے اور تعداد بتلانے کے لیے مقرر کرایا گیا ہے،اس کی کچھ ضرورت نہیں ہے، اصل کلمات یا د ہونے چاہیے۔ فقط واللہ تعالیٰ اعلم“

(کتاب الحظر ا الاباحۃ، علم کا بیان، ج :17، ص :244، ط :مکتبہ دارالعلوم دیوبند)

فتاوٰی عثمانی میں ہے :

” جواب: - اسلام کی بنیاد در اصل ان عقائد پر ہے جو ایمان مفصل میں بیان کئے گئے ہیں،ان عقائد پر ایمان  رکھتا تو مسلمان ہونے کے لیے ضروری ہے۔ اسی طرح کلمہ توحید یا کلمہ شہادت چونکہ اپنے عقائد کا اجمالی اعلان ہے، اس لیے یہ ہر مسلمان کو یاد ہونا چاہئے، باقی جو کلمات نماز وغیرہ کی کتابوں میں لکھے ہیں، انہیں بچوں کی تعلیم کی آسانی کے لئے لکھ دیا گیا ہے، ورنہ در حقیقت ان کا وہ  مقام نہیں جو کلمہ توحید، کلمہ شہادت یا ایمان مفصل کا ہے۔ اگر یہ کلمات کسی کو یاد نہ ہوں تو اس سے ایمان میں کوئی خلل واقع نہیں ہوتا، البتہ چونکہ ان کلمات کا پڑھنا بہت موجب و ثو اب ہے اور مسلمانوں کو ان کا درد رکھنا چاہئے، اس لئے بچوں کو یہ تمام کلمات سکھا دینے چاہئیں، اور کلمہ استغفار میں اختلاف کی وجہ یہ ہے کہ احادیث میں استغفار کے مختلف صیغے وارد ہوئے ہیں۔ ان میں سے جو صیغہ بھی پڑھ لیا جائے مقصود حاصل ہے، کیونکہ معنی کے لحاظ سے کوئی خاص فرق نہیں ہے، اور یہ ایسا ہی ہے جیسے درود شریف کے مختلف صیغے احادیث سے ثابت ہیں، لہذا اس مسئلے پر لڑائی جھگڑا کرنا انتہائی غلط ہے، مسلمانوں کو اس طرح کے نزاعات سے پر ہیز کرنا چاہئے۔“

(کتاب الایمان، فصل فی المتفرقات، ج :1، ص :53، ط :مکتبہ معارف القرآن)

فقط والله أعلم