رضاعی بھائی کی نسبی بہن سے نکاح کا حکم
سوال
میری بہن نے میری بیٹی کو دودھ پلایا ہے، اور میں نے ان کے بیٹے کو دودھ پلایا ہے۔ اس کے علاوہ میرا ایک بیٹا جسے میری بہن نے دودھ نہیں پلایا، اور ان کی ایک بیٹی ایسی ہے جسے میں نےدودھ نہیں پلایا۔ اب میں اپنے اس بیٹے کا رشتہ اپنی بہن کی اس بیٹی سے کرنا چاہتی ہوں۔ تو کیا شرعًا یہ رشتہ درست ہوگا کہ نہیں؟
جواب
صورتِ مسئولہ میں سائلہ اپنے جس بیٹے کا رشتہ اپنی بہن کی بیٹی سے کرنا چاہتی ہے، وہ لڑکی سائلہ کے مذکورہ بیٹے کے لیے رضاعی بھائی کی نسبی بہن ہے اور شرعاًرضاعی بھائی کی نسبی بہن سے نکاح کرنا جائز ہے۔ لہٰذا چونکہ سائلہ کے مذکورہ بیٹے اور بہن کی مذکورہ بیٹی کے درمیان نکاح سے مانع نسبی یا رضاعی رشتہ نہیں ہے؛ اس لیے ان دونوں کا آپس میں رشتہ کیا جاسکتا ہے۔ شرعًا اس میں کوئی حرج نہیں۔
فتاویٰ شامی میں ہے:
"(وتحل أخت أخيه رضاعا) يصح اتصاله بالمضاف كأن يكون له أخ نسبي له أخت رضاعية، وبالمضاف إليه كأن يكون لأخيه رضاعا أخت نسبا وبهما وهو ظاهر."
(کتاب النکاح، باب الرضاع، ج:3، ص:217، ط:ایج ایم سعید)
فقط واللہ اعلم
دارالافتاء — جامعہ علوم اسلامیہ علامہ محمد یوسف بنوری ٹاؤن
