بِسْمِ اللَّهِ الرَّحْمَنِ الرَّحِيم

6 جمادى الاخرى 1448ھ 17 نومبر 2026 ء

دارالافتاء

 

جون جولائی اور سالانہ فیس وصول کرنا/ کسی سےکم اور کسی سے زیادہ فیس وصول کرنا

سوال

عصری علوم اسکول والے ہر ماہ  ہم سے بچوں کی ماہانہ فیس وصول کرتے ہیں،بلکہ جون  اور جولائی کی فیس بھی وصول کرتے ہیں، جب کہ اسکول بند رہتا ہے، اور کوئی کہے کہ آپ کی ماہانہ فیس زیادہ ہے،تو کہتے ہیں کہ آپ حلف نامہ پر دستخط کریں کہ آپ مفلس ہیں، حالاں کہ کسی سے ماہانہ فیس چھ ہزار اور کسی سے ماہانہ فیس نو ہزار وصول کرتے ہیں، اور امتحانی فیس الگ وصول کرتے ہیں، اور ساتھ ساتھ سال کے آخر میں کہتے ہیں کہ آپ ہر ماہ فیس کے علاوہ سالانہ فیس بھی  جمع کروائیں، سوال یہ ہے کہ:

1۔کیا جون اور جولائی کی فیس لینا اسکول والوں کے لیے جائز ہیں یا نہیں؟

 2۔سالانہ فیس کے نام سے سالانہ فیس  اسکول  والوں سے کا مطالبہ جائز ہیں یا نہیں؟

3۔کیا  کسی سے زیادہ اور کسی سے کم ماہانہ فیس وصول کرنا جائز ہیں یا نہیں؟

جواب

1۔صورتِ مسئولہ میں  داخلے کے وقت اگر اسکول انتظامیہ نے جون جولائی کی فیس وصول کرنے کا معاہدہ کرلیا ہو  یا جون جولائی کی فیس کی ادائیگی عرفاً معروف ہو جیساکہ آج کے دور میں ہے تو اس صورت میں اسکول انتظامیہ کے لیے فیس وصول کرنا جائز ہوگا۔

2۔ اسکولوں میں تعلیمی و نصابی سرگرمیوں کے علاوہ، طلبہ کے لیے ہم نصابی سرگرمیاں اور ضمنًا و تبعًا بہت سے امور سرانجام  دیے جاتے ہیں جن کے لیے عرف کے مطابق فیسیں وصول کی جاتی ہیں، مروجہ سالانہ فیس بھی عمومًا ان اخراجات کی غرض سےلی جاتی ہے؛  لہٰذا  اس کا وصول کرنا جائز ہے۔

البتہ اگر پورے سال کے دوران طلبہ کو فراہم کی جانے والی خدمات اور سہولیات کی علیحدہ علیحدہ فیس وصول کی جاتی ہے تومحض  سالانہ فیس کے عنوان سے رقم وصول نہیں کرنی چاہیے۔

3۔اسکول انتظامیہ بعض والدین سے ماہانہ مقررہ کردہ فیس سے کم وصول کرے اور بعض سے پورا وصول کرے،اسکول انتظامیہ  کے لیے ایسا کرنا درست ہے۔

مشكوة المصابيح میں ہے: 

"و عن عمرو بن عوف المزني عن النبي صلى الله عليه و سلم قال: الصلح جائز بين المسلمين إلا صلحًا حرّم حلالًا أو أحلّ حرامًا، و المسلمون على شروطهم إلا شرطًا حرّم حلالًا أو أحلّ حرامًا."

(کتاب البیوع، باب الإفلاس و الانظار، ج: 1، ص: 259، ط: رحمانیة)

الاشباہ و النظائر میں ہے:

‌العادة ‌محكمة، وأصلها قوله - عليه الصلاة والسلام - «ما رآه المسلمون حسنا فهو عند الله حسن» قال العلائي لم أجده مرفوعا في شيء من كتب الحديث أصلا، ولا بسند ضعيف بعد طول البحث، وكثرة الكشف والسؤال، وإنما هو من قول عبد الله بن مسعود - رضي الله تعالى عنه - مرفوعا عليه، أخرجه أحمد في مسنده

(غمز عيون البصائر في شرح الأشباه والنظائر، الفن الأول، القاعدة السادسة 1/ 295 ط: دار الكتب العلمية)

الموسوعة الفقھیه الکويتیة میں ہے:

"وقول النبي صلى الله عليه وسلم: المسلمون على شروطهم عام في إيجاب الوفاء بجميع ما يشرطه الإنسان على نفسه، ما لم تقم دلالة تخصصه لكن هذا الحكم ليس عاما في كل الالتزامات، وذلك لتنوع الالتزامات بحسب اللزوم وعدمه، وبيان ذلك فيما يأتي:

 (1) الالتزامات التي يجب الوفاء بها:

40 - أ - الالتزامات التي تنشأ بسبب العقود اللازمة بين الطرفين، كالبيع والإجارة والصلح وعقود الذمة، فهذه الالتزامات متى تمت صحيحة لازمة وجب الوفاء بها ما لم يحدث ما يقتضي الفسخ، كالهلاك والاستحقاق والرد بالعيب، وهذا شامل للأعيان الواجب تسليمها، وللديون التي تكون في الذمم كبدل القرض وثمن المبيع والأجرة في الإجارة."

(‌‌التزام، ‌‌حكم الوفاء بالالتزام وما يتعلق به، ج: 6، ص: 162، ط: دارالسلاسل)

مجلة الأحکام العدلیہ میں ہے:

"‌يتصرف صاحب الملك المستقل في ملكه كيفما شاء."

(‌‌الكتاب العاشر، ‌‌الباب الأول،  ‌‌الفصل الثاني، ص: 206، ط: كارخانه تجارتِ كتب، آرام باغ، كراتشي)

الأشباۃ والنظائر ابن نجیم میں ہے:

"قال في إجارة الظهيرية: ‌المعروف عرفا ‌كالمشروط شرعا."

(‌‌القاعدة السادسة، ‌‌المبحث الثالث، ص: 84، ط: دار الكتب العلمية)

فقط واللہ اعلم

دارالافتاء — جامعہ علوم اسلامیہ علامہ محمد یوسف بنوری ٹاؤن


فتویٰ نمبر 144607102471
تاریخ17-11-2026

تلاش

سوال پوچھیں

اگر آپ کا مطلوبہ سوال موجود نہیں تو اپنا سوال پوچھنے کے لیے نیچے کلک کریں، سوال بھیجنے کے بعد جواب کا انتظار کریں۔ سوالات کی کثرت کی وجہ سے کبھی جواب دینے میں پندرہ بیس دن یا اس سے زائد وقت بھی لگ جاتا ہے۔

سوال پوچھیں