والدہ کی اجازت کے بغیر ان کا مکان تقسیم کرنا

ہر شخص اپنی زندگی میں اپنی جائیداد کا خود مالک  ومختار ہوتا ہے، وہ  اپنی جائیداد میں ہر جائز تصرف  کرسکتا ہے، کسی کو یہ حق نہیں  ہے کہ اسے اپنی ملک میں تصرف  کرنے سے منع کرے  ، یا اس کی اجازت کے بغیر اس کی ملکیت میں کوئی تصرف کیاجائے،نیز والدین کی زندگی میں اولاد وغیرہ کا ان کی جائیداد میں حصہ  نہیں  ہوتا،  اور نہ ہی کسی کو مطالبہ کا حق حاصل  ہوتاہے ۔ 

لہذا صورتِ مسئولہ میں جب  مذکورہ مکان سائل کی والدہ کی ملکیت ہے ، اور وہ اپنی زندگی میں اس مکان کو تقسیم  نہیں کرنا چاہتی ، تو اولاد کا والدہ سے اس مکان کا مطالبہ  کرنایا سائل کا والدہ کی مرضی کے بغیر اس مکان کو بہن بھائیوں میں تقسیم کرنا ہرگز جائز نہیں ہے ۔

مشكاة المصابيح ميں هے:

"و عن أبي حرة الرقاشي عن عمه قال: قال رسول الله صلى الله عليه وسلم: «ألا لاتظلموا ألا لايحل مال امرئ إلا بطيب نفس منه» . رواه البيهقي في شعب الإيمان والدارقطني في المجتبى."

(كتاب البيوع، باب الغصب والعارية،ج:2،ص:889،ط:المكتب السلامي)

ترجمہ : اور حضرت  ابو حرہ رقاشی رضی اللہ عنہ اپنے چچا سے نقل کرتے ہیں کہ رسول اللہ صلی اللہ علیہ وسلم نے فرمایا:" خبردار!کسی پر ظلم نہ کرنا، جان لو! کسی بھی دوسرے شخص کا مال اس کی  مرضی وخوشی کے بغیر حلال نہیں۔"

فتاوی شامی میں ہے :

"لا يجوز التصرف في مال غيره بلا إذنه ولا ولايته."

(كتاب الغصب،مطلب فيما يجوز من التصرف بمال الغير بدون إذن صريح، ج:6، ص:200، ط: سعید)

مجلۃ الاحکام العدلیۃ میں ہے:

"(المادة 96) : لا يجوز لأحد أن يتصرف في ملك الغير بلا إذنه."

(‌‌المقالة الثانية في بيان القواعد الكلية الفقهية،ص27،ط؛دار الجیل)

فقط واللہ اعلم