انوشہ نام کا تلفظ ، معنیٰ اور یہ نام رکھنے کا حکم

"انوشہ" فارسی زبان کا لفظ ہے، جس کا صحیح تلفظ "اُنُوشَہ" (الف اور نون کے پیش، واو کے سکون، شین کے زبر اور ہاء کے جزم کے ساتھ) ہے، اور اس کے معنیٰ ہیں خوشحال، خرم، نوجوان بادشاہ، بے زوال و جاودانی حیثیت رکھنے والا۔

اس لفظ کے لغوی معنیٰ کے اعتبار سے یہ نام لڑکے کے لیے رکھنا زیادہ مناسب معلوم ہوتا ہے، تاہم اگر یہ لڑکی کا نام بھی رکھ لیا جائے تو کوئی مضائقہ نہیں، اور اس لفظ کا انگریزی تلفظ  "unusha" ہوگا۔

غیاث اللغات میں ہے:

"انوشہ: بضمتین  و واو مجہول وشین معجمہ بمعنی خُرّم وخوشحال وپادشاہِ نوجوان، ومجازاً بمعنی داماد"

(باب الالف المقصورہ، فصل الف مقصورہ مع نون، صفحہ نمبر ٨٠، ط: قدیمی کتب خانہ)

حسن اللغات (فارسی - اردو)  میں ہے:

"اُنوشہ: (ف) دولہا - داماد (٢) نوجوان بادشاہ (٣) خوشحال"

(باب الف مقصورہ، ا-ن، صفحہ نمبر: ٧٣، ط: اورینٹل بک سوسائیٹی، لاہور)

فیروز اللغات فارسی میں ہے:

"انُوشَہ:  جوان بادشاہ (2) خوش، (3) بے زوال، جاودانی حیثیت رکھنے والا"

(ا ن و، صفحہ نمبر: ٨٣، ط: فیروز سنز)

فقط واللہ اعلم