ایک بیوہ، دو بیٹے اور دو بیٹیوں میں میراث کی تقسیم
سوال
میرے شوہر کا انتقال ہو گیا ہے اور میرے دو بیٹے اور دو بیٹیاں ہیں میراث کی تقسیم کس طرح کی جائے گی؟
جواب
صورت مسئولہ میں مرحوم شوہر کے ترکہ کی تقسیم کی صورت یہ ہوگی کہ مرحوم کے کفن دفن کے اخراجات اور قرضہ جات کی ادائیگی کے بعد مرحوم نے اگر کوئی جائز وصیت کی ہو تو اسے بقیہ مال کے ایک تہائی ترکہ میں سے نافذ کرنے کے بعد بقیہ جائیداد منقولہ و غیر منقولہ کو 48 حصوں میں تقسیم کرکے بیوہ کو 6 حصے ، ہر ایک بیٹے کو 14،14 حصے اور ہر ایک بیٹی کو 7،7 حصے ملیں گے۔
صورت تقسیم یہ ہے:
میت: 48/8
| بیوہ | بیٹا | بیٹا | بیٹی | بیٹی |
| 1 | 7 | |||
| 6 | 14 | 14 | 7 | 7 |
یعنی فیصد کے اعتبار سے بیوہ کو 12.5 فیصد، ہر ایک بیٹے کو 29.16فیصد اور ہر ایک بیٹی کو 14.58فیصد حصہ ملے گا۔
(نوٹ: یہ تقسیم اس صورت میں ہے جب کہ مرحوم شوہر کے والدین حیات نہ ہوں اور مرحوم کی ایک ہی بیوہ ہو، بصورت دیگر تقسیم مختلف ہوگی۔)
فقط واللہ اعلم
دارالافتاء — جامعہ علوم اسلامیہ علامہ محمد یوسف بنوری ٹاؤن
