مومن کے ماہ وسال کتاب پر اعتراض
سوال
مومن کے ماہ وسال جو کتاب ہے اس کے مصنف شاہ عبدالحق محدث دہلوی ہیں اس پر مفتی اعظم مفتی شفیع صاحب کا مقدمہ ہے اقبال صاحب نے اس کا ترجمہ کیا ہے اس کتاب کے اندر بہت سی غلط بات نظر آئی جس پر باطل فرقے اعتراض کر رہے ہیں جیسے صفحہ نمبر 38 پر صحابہ کی شان میں گستاخی کی گئی ہے اور صفحہ نمبر 160 پر غوث اعظم کے گیارہویں کے عرس منانے کو جائز قرار دیا گیا ہے ؟
جواب
کتاب" مومن کے ماہ وسال" جو کہ عربی کتاب " ماثبت بالسنۃ فی ایّام السنۃ " (مؤلف: محدث الجلیل عبدالحق بن سیف الدین الدہلوی، المتوفیٰ:1052ھ) کا اردو ترجمہ ہے مولانا اقبال الدین شاہ نے کیا ہے، اور اس پر مفتی شفیع صاحب رحمہ اللہ کا مقدمہ بھی ہے، اس کتاب میں حضورِ اکرم صلی اللہ علیہ وسلم کی مقدّس تعلیمات کی روشنی میں ہر مسلمان کے لئے اعمال/ نماز/ روزہ/ دعاوؤں واستغفار کا ایک مکمل دستور العمل موجود ہے، جس کی بناء پر اس کتاب سے استفادہ کرنا چاہیے، تاہم اگر کسی کو مذکورہ کتاب میں موجود کسی بات پر اعتراض ہے، تو اعتراض واضح ہونے کے بعد جواب دیا جاسکتا ہے۔
فقط واللہ اعلم
دارالافتاء — جامعہ علوم اسلامیہ علامہ محمد یوسف بنوری ٹاؤن
