ایشال ، عشل یا عشال نام رکھنا
سوال
ایشال زہرہ یا عیشل زہرہ یا عشال زہرہ نام کا کیا مطلب ہے اور یہ نام رکھنا کیسا ہے؟
جواب
"عیشل" اور "ایشال" کے معانی ہمیں کسی مستند لغت میں نہیں مل سکے۔
البتہ اگر یہ لفظ "عِشال" ہو یعنی "عین" کے نیچے زیر کے ساتھ ہو تو عربی لغت میں استعمال نہیں ہوتا۔ لیکن "عَشّال" یعنی "عین" پر زبر اور "ش" پر تشدید کے ساتھ اور " عاشِل" کا معنی ہے: "اٹکل سے درست اندازا لگانے والا"۔(لسان العرب)
یہ ( عَشّال اور عاشِل ) مرد کی صفت ہے، لڑکی کے لیے استعمال کیا جائے تو " عاشله" استعمال ہوگا۔ بچی کا نام "عاشله" رکھا جاسکتاہے۔
نیز "ایشال" یہ "وشل" سے ہے، اس کے معنی پانی کا کم ہونا ، اس معنی کے اعتبار سے یہ نام مناسب نہیں۔
بچوں کے نام رکھنے کے سلسلے میں بہتر یہ ہے کہ صحابہ و صحابیات رضوان اللہ علیہم اجمعین اور تابعین رحمہم اللہ کے نام پر نام رکھا جائے یا اللہ کے نیک اور برگزیدہ بندوں کے نام پر نام رکھا جائے یا کم از کم ایسا نام رکھا جائے جس کا معنی عمدہ ہو۔
جامعہ علوم اسلامیہ بنوری ٹاؤن کی ویب سائٹ پر کافی اسلامی نام درج کردیے گئے ہیں ، بچوں کا نام رکھنے کے سلسلے میں وہاں سے بھی راہنمائی لی جاسکتی ہے۔
فقط واللہ اعلم
دارالافتاء — جامعہ علوم اسلامیہ علامہ محمد یوسف بنوری ٹاؤن
