قیدیوں کی امامت کا حکم

صورتِ مسئولہ میں قیدی میں اگر امامت کی اہلیت پائی جارہی ہو تو اس کے پیچھے نماز پڑھنا درست ہے۔اور قیدیوں میں سب سے زیادہ امامت کا حق دار وہ قیدی ہوگا جو نماز کے مسائل سے سب سے زیادہ واقف ہو  اور اُسے اتنا قرآنِ پاک یاد ہوکہ نماز میں مسنون قراءت کی مقدار تجوید کے مطابق کرسکے، بشرطیکہ وہ کھلے  عام کبیرہ گناہوں کا مرتکب نہ ہویا باطل عقائد کا حامل نہ ہو۔ اگر علم میں سب برابر ہوں تو اچھی تلاوت کرنے والا مستحق ہوگا، اور اگر تلاوت میں بھی سب یکساں ہوں تو ان میں سے جو سب سے زیادہ پرہیزگار ہوگا وہ امامت کا زیادہ حقدار ہوگا۔

فتاوی شامی میں ہے:

"(و الأحقّ بالإمامة) تقدیمًا بل نصبًا مجمع الأنھر (الأعلم بأحکام الصلاۃ) فقط صحةً و فسادًا بشرط اجتنابه للفواحش الظاهرة، وحفظه قدر فرض، و قیل واجب، و قیل: سنة (ثم الأحسن تلاوۃ) و تجویدًا (للقراءۃ، ثم الأروع) أي: الأکثر اتقاء للشبھات."

(الدر المختار مع رد المحتار: كتاب الصلاة ، باب الإمامة، (557/1) ط: سعید)

فقط واللہ اعلم