بیوہ، بیٹی، والدہ اور والد کے درمیان وراثت تقسیم کرنے کا طریقہ
سوال
مندرجہ ذیل ورثاء میں وراثت کی تقسیم کیسے ہو گی؟
ورثاء:بیوہ، ایک بیٹی، باپ، ماں، ایک بھائی اورتین بہنیں۔
جواب
صورت مسئولہ میں وراثت تقسیم کرنےکا شرعی طریقہ یہ ہے کہ سب سے پہلےمرحوم کے حقوقِ متقدمہ یعنی تجہیز وتکفین کا خرچہ ادا کرنے کے بعد ، میت کے ذمہ اگرکوئی قرض ہوتو اسے ادا کرنے کے بعد، میت نے اگر کوئی جائز وصیت کی ہوتوا سے ترکہ کےایک تہائی سے نافذ کرنے کے بعدباقی کل ترکہ منقولہ وغیر منقولہ کو 24حصوں میں تقسیم کرکے بیوہ کو 3حصے، بیٹی کو 12 حصے، والدہ کو 4 حصے اور والد کو 5 حصے ملیں گے، جب کہ بھائی اور بہن اس صورت میں ترکہ میں شرعاً حق دار نہیں ہیں۔
تقسیم کی صورت یہ ہے:
میت:24
| بیوی | بیٹی | والدہ | والد | بھائی | بہن | بہن | بہن |
| 3 | 12 | 4 | 5 | محروم | |||
یعنی مثلاً 100روپے میں سے بیوہ کو12.5 روپے، بیٹی کو 50روپے، والدہ کو 16.66روپے اور والد کو20.83 روپے ملیں گے۔
فقط واللہ اعلم
دارالافتاء — جامعہ علوم اسلامیہ علامہ محمد یوسف بنوری ٹاؤن
