روایت: عورت کی برکت یہ ہے کہ اس سے پہلی بار بیٹی پیدا ہو، کی تحقیق

سوال میں ذکر کردہ روایت تاریخ ابن عساکر کے علاوہ "مکارم الأخلاق للخرائطی "(ص:213،رقم الحدیث :646)،"تفسیر ابن مردویه"، اور"مسند فردوس للديلمي"  (1/ 214) میں موجود ہے، مگر جس سند سےنقل کی گئی ہے اس میں حد درجہ ضعف ہے، کیوں کہ اس سند کے بنیادی راوی العلاء بن کثیر ہیں ، جن کو امام بخاری اور ابو حاتم رازی نے  ’’منکر الحدیث‘‘  کہا ہے۔  (التاريخ الكبير:  6 /514، و الجرح والتعديل:  6 / 360)،اور  وہ روایت نقل کرتے ہیں مکحول سے، امام ابن عدی رحمہ اللہ تعالی کا کہنا ہے کہ:

"و للعلاء ابن كثير عن مكحول عن الصحابة عن النبي صلى الله عليه وسلم نسخ كلها غير محفوظة و منكر الحديث." (5 / 219)

یعنی  العلاء بن کثیر عن مکحول سے مروی تمام نسخے غیر محفوظ ہیں ۔

تقریب التهذيب میں ہے :

"متروك رماه ابن حبان بالوضع". (436)

نیز اس سند کے دیگر راوی بھی کمزور ہیں۔یہی وجہ ہے کہ ابن الجوزی نے اس حدیث کو اپنی کتاب الموضوعات  (2 / 276) میں، علامہ شوکانی نے  ’’الفوائد المجموعة‘‘ (133) میں نقل کیا ہے۔ حافظ  سیوطی نے  ’’اللآلئ المصنوعة‘‘  میں اس کے دو شاہد  نقل کیےہیں، لیکن  ان پر بھی سخت کلام ہے۔  (2/ 149)۔لہٰذا جب تک کوئی معتبر سند نہ ملے تو  حدیث کو بیان کرنے میں احتیاط کرنی چاہیے۔

فقط والله أعلم