اسلام اور کلمہ کو گالی دینے والے کا حکم

واضح رہے کہ ایمان و اسلام اور کلمۂ اسلام کو برا بھلا کہنا ، گالی دینا کفر ہے ؛ لہذا اگر کوئی شخص اسلام کویاکلمہ کوگالیاں دے  تو اس سے وہ شخص کافر ہو جائے گا  ،اس پر لازم ہے کہ توبہ و استغفار کرے اور اپنے  ایمان کی تجدید کرتے ہوئے نکاح کی بھی تجدید کرے ۔

« الفتاوى الهندية»  میں ہے :

"رجل قال للآخر: مسلمانم، فقال له: لعنت برتو و بر مسلماني تو يكفر، كذا في الخلاصة."

(مطلب في موجبات الكفر :  2 / 257 ، ط : المطبعة الكبرى الأميرية ببولاق مصر)

فتاوی دار العلوم دیوبند میں ہے :

"(سوال)اگر کوئی شخص اہل ِ اسلام اور مذہب ِ اسلام کی توہین کرے اور برے الفاظ بولے اور گالی گفتا ر دے وے ،  ایسے شخص کی نسبت کیا حکم ہے ؟

(الجوب )اس میں کوئی شک و شبہ نہیں ہے کہ جو شخص دین ِ اسلام کو برا کہے اور گالیاں دے ،  وہ اسلام سے خارج ہے  ، اس کو لازم ہے کہ توبہ کرے اور تجدید ِ اسلام کرے اور تجدید ِنکاح کرے ،  ورنہ اس سے اہلِ اسلام کو متارکت اور علیحدگی فرض ہے۔"

(فتاوی دار العلوم دیوبند  ، احکام ِمرتد : 12 / 214 ، ط : دار الاشاعت )

تتمہ احسن الفتاوی میں ہے :

"سوال :ہمارے دیہی علاقوں میں یہ وبا  عام ہے کہ غصہ کی حالت میں دوسرے مسلمان بھائی کو مذہب و ایمان نیز پیر و مرشد کی غلیظ گالی دی جاتی ہے ، ویسے گپ شپ میں بھی یہ گالی دی جاتی ہے، بلکہ یہ گالی تکیہ کلام کے طور پر استعمال کی جاتی ہے ،  مذہب و ایمان کو گالی دینا کیسا ہے اور ایسے شخص کا کیا حکم ہے ؟

الجوب باسم ملہم الصواب

ایمان و اسلام کو گالی دینا کفر ہے ، ایسی کفریات سے احتراز واجب ہے ، ایسے شخص پر توبہ فرض ہے ، توبہ اور تجدید ِ ایمان کے بعد تجدید ِ نکاح بھی کریں ۔"

(کتاب الایمان و العقائد : 3 ، ط : الحجاز بنوری ٹاؤن کراچی)

فقط و اللہ اعلم