ایک طلاق کے بعد رجوع کا حکم

صورتِ  مسئولہ میں جب آپ نے اپنی بیوی کو یہ جملہ   : ”جاؤ !   میں نے تمیں طلاق دی “ تو اس سے آپ کی بیوی پر ایک طلاقِ رجعی واقع ہوگئی، اور ایک طلاقِ رجعی کے بعد عدت ( یعنی اگر حمل نہ ہو تو  مکمل تین ماہواریاں گزرنے سے پہلے ، اور حمل ہونے کی صورت میں بچہ کی ولادت سے پہلے تک ) رجوع کیاجاسکتاہے،اگر مرد اپنی بیوی سے رجوع کرنا چاہے تو زبان سے کہہ دے کہ : ”میں نے رجوع کرلیا“،اس سے قولی طور پر رجوع ہوجائے گا،اور اگر زبان سے کچھ نہ کہے بلکہ بیوی سے تعلق قائم کرلے یاخواہش و رغبت سے اسے چھوئے یابوسہ لے لے تو  اس سے بھی رجوع ہوجائے گا۔حاصل یہ ہے کہ قولاً یاعملاً رجوع کرلیناکافی ہے، البتہ قولی رجوع کرنا اوراس پر گواہان قائم کرنا مستحب ہے۔

اگر عدت پوری ہوگئی اور رجوع نہیں کیا تو نکاح ختم ہوجائے گا ،اس کے بعد دونوں کاارادہ ساتھ رہنے کاہوتو دونوں کی رضامندی سے  نیا مہر مقرر کرکے گواہوں کی موجودگی میں تجدیدِنکاح (دوبارہ نکاح کرنا) کافی ہوگا،دونوں صورتوں میں  اس کے بعد شوہر کے  پاس دوطلاقوں  کا حق  ہوگا۔(فتاویٰ شامی،3/230،ط:ایچ ایم سعید)۔فقط واللہ اعلم