مغرب اور عشاء کے درمیان نوافل

بصورتِ  مسئولہ مغرب کی نماز  کی سنتوں کے بعد نوافل پڑھنا جس کو  صلاۃ الاوّابین  کہتے  ہیں، مستحب ہے، جس کی کم سے کم تعداد  چھ ہے، اور زیادہ سے زیادہ بیس رکعت ہے، مختلف احادیث میں صلوۃ الاوابین پڑھنے والوں کے  لیے بڑی فضیلتیں مذکور ہیں، جیسے کہ حدیث شریف میں ہے:

"عن أبي هريرة، قال: قال رسول الله صلى الله عليه وسلم: «من صلى بعد المغرب ست ركعات لم يتكلم فيما بينهن بسوء عدلن له بعبادة ثنتي عشرة سنةً»."

(سنن الترمذى، باب ماجاء فى فضل التطوع وست ركعات بعد المغرب، رقم الحديث:435، ج:2، ص:299، ط:مطبعة مصطفى)

"حضرت ابوہریرہ رضی اللہ عنہ سے مروی ہے کہ آپﷺ نے فرمایا:جو شخص مغرب کی نماز کے بعد چھ رکعتیں اس طرح پڑھے کہ ان کے درمیان کوئی بری بات زبان سے نہ نکالے تو یہ چھ رکعات اس کے لیے بارہ سال کی عبادت کے برابر شمار ہوں گے۔"

لہٰذا مذکورہ فضیلت حاصل کرنی ہو تو مغرب کی سنتوں کے متصل بعد دنیاوی امور سے متعلق بات چیت کیے بغیر چھ رکعت پڑھ لینی چاہییں۔ باقی  کسی دنیاوی کام میں مشغول ہونے کے بعد یا عشاء سے  پہلے سننِ غیرمؤکدہ کے  طور  پر بھی  نوافل   پڑھے جاسکتے ہیں۔

فقط واللہ اعلم