مغرب کے بعد ولادت کی صورت میں عقیقہ کس دن کیا جائے؟

عقیقہ کے دنوں میں دن سے مراد شرعی دن ہے،  اور شرعی دن صبح صادق سے غروبِ آفتاب تک ہوتا ہے، اور ہر  رات، آنے والے دن میں شامل ہے، اس اعتبار سے سورج غروب ہونے کے بعد بچہ پیدا ہوا تو آنے والا بعد کا دن اس کی ولادت کا دن شمار ہوگا۔

  لہذا صورتِ مسئولہ میں  جب  بچہ کی ولادت مغرب کے بعد ہوئی ہے تو اگلے ہفتہ اس ولادت کے دن سے پہلے والا دن اس کا ساتواں دن ہوگا، مثلاً اگر بچہ کی ولادت  پیر کے دن سورج غروب ہونے کے بعد رات 8 بجے ہوئی ہے  تو وہ رات منگل  کی رات شمار ہوگی، اور اس بچہ کی ولادت کا پہلا دن منگل کا دن کہلائے گا، اور آئندہ  پیر کا دن  اس کا ساتواں دن شمار ہوگا، اس میں عقیقہ کرنا مستحب ہوگا۔ فقط واللہ اعلم