بغیر صابن کے غسل کرنے کا حکم

غسلِ جنابت میں منہ اور ناک میں پانی ڈالنے کے بعد پورے جسم پر اس طرح پانی بہا دینا کافی ہے کہ جسم میں بال کے بقدر بھی کوئی حصہ خشک نہ رہ جائے، صابن کا استعمال نظافت کے لیے اچھا ہے، لیکن غسلِ جنابت کے صحیح ہونے کے لیے صابن کا استعمال کرنا ضروری نہیں ہے۔

واضح رہے کہ فرض غسل کے کل تین فرائض ہیں:

1. اچھی طرح کلی کرنا۔
2. ناک  کی نرم ہڈی تک پانی پہنچانا۔
3. سارے بدن پر اس طور پر پانی بہانا کہ بدن کا کوئی حصہ بھی خشک نہ رہے۔

پس صورتِ مسئولہ میں صابن یا شیمپو  لگانا غسلِ واجب کے لیے ضروری نہیں، خالص پانی سے فرائضِ غسل ادا کرنے سے طہارت حاصل ہو جائے گی۔ فقط واللہ اعلم