داماد کا ساس کی ماں سے پردے کا حکم

محرم رشتے جس طرح نسب کے اعتبار سے ہوتے ہیں، اسی طرح بعض سسرالی رشتے بھی محرمیت کا سبب ہوتے ہیں،  اس سسرالی رشتے کو  ”مصاہرت“  کہتے ہیں،  جیسے: سسر، ساس، اور ان کے اصول یعنی  ان کا پدری اور مادری سلسلہ، اور بیوی کی بیٹی، شوہر کا بیٹا وغیرہ، ان رشتہ داروں سے حرمت کو ”حرمتِ مصاہرت“  کہا جاتا ہے، اسلام نے  نسب اور مصاہرت دونوں قسم کے رشتوں کے احترام کا حکم دیا ہے، ارشادِ باری تعالیٰ ہے:

{ وَهُوَ الَّذِي خَلَقَ مِنَ الْمَاءِ بَشَرًا فَجَعَلَهُ نَسَبًا وَصِهْرًا} [الفرقان: 54]

 ترجمہ:”اللہ وہ ذات ہے  جس نے پانی سے انسان کو بنایا اور پھر اس کو خاندان والا اور سسرال والا بنایا“۔

 اور اللہ پاک نے یہ تذکرہ  احسان شمار کرنے کی جگہ پر  کیا ہے جو ان رشتوں کی عظمت اور قابلِ احترام ہونے کی دلیل ہے۔

لہذا داماد کے لیے ساس کی ماں محرم ہے، اور اس سے عدت میں یا عام حالت میں پردہ نہیں ہے۔ فقط واللہ اعلم