بینک میں موجود رقم پر زکاۃ

صورتِ  مسئولہ میں بینک میں موجود رقم پر زکات واجب ہے۔ جس کے حساب کا طریقہ یہ ہے کہ آپ کے بینک میں رکھی ہوئی رقم، اور اسی طرح آپ کی ملکیت میں اگر سونا، چاندی، نقدی یا مال تجارت وغیرہ ہو تو ان سب کے مجموعہ کی قیمت معلوم کریں، اور اس کے بعد  زکات کا سال پورا ہونے تک کے واجب الادا  اخراجات مثلاً قرضہ، بل وغیرہ اس سے منہا کریں، جو رقم بچ جائے اگر وہ ساڑھے باون تولہ چاندی کی قیمت سے زیادہ ہو تو اس کا ڈھائی فیصد زکات میں دے دیں۔

واضح رہے کہ سونے کے نصاب ساڑھے سات تولہ کا اعتبار اس وقت کیا جاتا ہے جب ملکیت میں صرف سونا ہو اور چاندی یا نقدی وغیرہ کچھ نہ ہو۔ نیز یہ بھی ذہن نشین رہے کہ ساڑھے سات تولہ کا وزن گرام کے اعتبار سے 87.47gm ہوتاہے۔ فقط واللہ اعلم