بڑی عمر میں اپنا اور اپنی بیوی کا عقیقہ کرنا
سوال
کیا میں اپنا عقیقہ کرسکتاہوں جب کہ میری عمر 42سال ہے ۔ اور کیا میں اپنی بیوی کا عقیقہ کر سکتا ہوں؟
جواب
عقیقہ کا مستحب وقت یہ ہے کہ پیدائش کے ساتویں دن عقیقہ کرے، اگر ساتویں دن عقیقہ نہ کرسکے تو چودھویں (14) دن ، ورنہ اکیسویں (۲۱) دن کرے، اس کے بعد عقیقہ کرنا مباح ہے،اگر کرلے تو ادا ہوجاتا ہے، تاہم جب بھی عقیقہ کرے بہتر یہ ہے پیدائش کے دن کے حساب سے ساتویں دن کرے، اگر بچپن میں عقیقہ نہ ہوا تو بڑی عمر میں اپنا عقیقہ خود بھی کیا جاسکتا ہے، عقیقہ ادا ہوجائے گا ، اگرچہ مستحب وقت کی فضیلت حاصل نہیں ہوگی۔ لہذا آپ اپنا اور اپنی بیوی کا عقیقہ کرسکتے ہیں۔
’’ مصنف ابن أبي شیبة ‘‘ :
"عن محمد [ابن سیرین] قال : ’’ لو أعلم أنه لم یعقّ عني لعققتُ عن نفسي ‘‘. (۱۲/۳۱۹ ، حدیث :۲۴۷۱۸ ، کتاب العقیقة، ط : المجلس العلمي أفریقا)
’’ إعلاء السنن ‘‘ :
"عن الحسن البصري : ’’ إذا لم یعق عنك فعقّ عن نفسك، وإن کنت رجلاً ‘‘. (۱۷/۱۳۴، باب أفضلیة ذبح الشاة في العقیقة، تحت حدیث :۵۵۱۴ ، بیروت) فقط واللہ اعلم
دارالافتاء — جامعہ علوم اسلامیہ علامہ محمد یوسف بنوری ٹاؤن
