بیٹا پیدا ہوا تو اس کا نام آپ صلی اللہ علیہ وسلم کے نام پر رکھنے کی نذر ماننا اور کیا شہیر آپ صلی اللہ علیہ وسلم کے ناموں میں سے ہے؟

”شہیر“  کے معنی ہیں”بہت زیادہ مشہور، معروف“  نیز یہ آپ ﷺ کے صفاتی ناموں میں سے بھی ہے، (حدیقۃ الصفا فی اسماء النبی المصطفیٰ ﷺ , تالیف:مخدوم سید محمد ہاشم ٹھٹھوی رح)۔

 لہذا اگر اللہ تعالیٰ آپ کو بیٹے کی نعمت سے نوازیں تو  آپ اس کا نام ”محمد شہیر“ رکھ سکتی ہیں۔

تاہم دو باتیں ملحوظ رہیں:

(1)  حمل بیٹا ہے یا بیٹی ہے، اس کا علم صرف اللہ رب العزت کے پاس ہے، ڈاکٹر حضرات کی بات محض ظنی اور تخمینی ہوتی ہے، لہذا  اس متعلق ان کی بات پر کلی اعتماد نہ کیا جائے، اور اللہ تعالیٰ بیٹا یا بیٹی جو بھی نعمت سے نوازیں اس پر اس کا شکر گزار ہونا چاہیے۔

(2) نذر کے منعقد ہونے کی من جملہ شرائط میں سے ہے کہ وہ عبادتِ مقصودہ ہو، اور اس کی جنس میں سے  کوئی فرض  عبادت ہو، مباح چیزوں کی نذر لازم نہیں ہوتی، لہذا آپ نے جو یہ نذر مانی کہ ”  اگر بیٹا پیدا ہوا  تو میں محمد ﷺ  کے ناموں میں کوئی نام رکھوں گی“ اس سے یہ نذر لازم نہیں ہوئی ہے، آپ اس کے علاوہ بھی کوئی نام رکھنا چاہیں تو رکھ سکتی ہیں۔

البتہ ”محمد شہیر “ نام بھی اچھا ہے، یہ بھی رکھ لیں تو ٹھیک ہے۔ فقط واللہ اعلم