مرحوم کی طرف سے نمازوں فدیہ ادا کرنا

ایک نماز کا فدیہ ایک صدقہ فطر کے برابر ہے اور روزانہ وتر کے ساتھ چھ نمازیں ہیں تو ایک دن کی نمازوں کے فدیے بھی چھ ہوئے، اور ایک صدقہ فطر تقریباً پونے دو کلو گندم یا اس کاآٹا یا اس کی قیمت ہے۔

جب مرحوم نے فدیہ کی وصیت نہیں کی تو شرعاً ورثہ پر فدیہ ادا کرنا لازم نہیں، البتہ اگر عاقل وبالغ ورثہ از خود اپنے حصے سے باہمی رضامندی سے ادا کردیں تو امید ہے کہ مرحوم آخرت کی باز پرس سے بچ جائیں گے، اور اگر فدیہ ادا کرنا چاہیں اور قضا شدہ نمازوں کی تعداد معلوم نہیں تو اندازہ کر لیں کہ کتنی نمازیں قضا ہوئی ہیں، اس حساب سے فدیہ ادا کر دیں، اگر یک مشت نہ ہوسکے تو تھوڑا تھوڑا کرکے وقتاً فوقتاً ادا کرتے رہیں۔ فقط واللہ اعلم