جس کاغذ پر محمد علی نام لکھا ہو اسے ردی میں ڈالنا

نام میں اگر کسی مقدس ہستی، یا قرآن کا لفظ، یا اللہ کا نام، یا مقدس اشیاء کا نام ہو اور وہ کاغذ وغیرہ پر لکھا جائے تو اس کا احترام کرنا ضروری ہے،  اس لیے اگر کسی کاغذ پر کوئی مقدس نام ہو تو اس کو پھینکنے سے پہلے اس کو کاٹ کر نکال لیں  یا وہ نام بالکل مٹادیں تو اس کے بعد اس کو ضائع کردینے کی گنجائش ہوگی، اس لیے "محمد علی" نام اگرچہ آپ کا نام ہے، لیکن لفظ ” محمد“ کی نسبت آپ ﷺ کی طرف ہے، نیز "علی" بھی محترم نام ہے؛ اس لیے نام بھی محترم ہے، اس کا احترام ضروری ہے۔

فتاوی ہندیہ میں ہے:

’’ولو كتب القرآن على الحيطان و الجدران، بعضهم قالوا: يرجى أن يجوز، و بعضهم كرهوا ذلك مخافة السقوط تحت أقدام الناس، كذا في فتاوي قاضيخان‘‘. ( الباب الخامس في آداب المسجد، و ما كتب فيه شيئ من القرآن، أو كتب فيه اسم الله تعالى، ٥/ ٣٢٣، ط: رشيدية)

وفیہ ایضاً:

’’إذا كتب اسمَ ’’فرعون‘‘ أو كتب ’’أبو جهل‘‘ على غرض، يكره أن يرموه إليه؛ لأن لتلك الحروف حرمةً، كذا في السراجية‘‘. (٥/ ٣٢٣، ط: رشيدية)  فقط واللہ اعلم