اگر روزے سے طبیعت خراب ہونے کا اندیشہ ہو تو روزے کا حکم

اگر کوئی بیمار ایسا ہو کہ روزہ رکھنے کی وجہ سے واقعۃً اس کی بیماری بڑھنے کا غالب گمان ہو، (یعنی ایسی بیماری میں روزہ رکھنے سے عموماً مرض بڑھ جاتاہو، یا اس شخص کا اپنا تجربہ یہی ہو) یا مسلمان دین دار (کم از کم نماز روزے کا پابند) ڈاکٹر روزہ چھوڑنے کا کہے  تو ایسے شخص کو شریعت نے روزہ چھوڑنے کی گنجائش دی ہے کہ ابھی روزہ نہ رکھے، صحت یاب ہو جانے کے بعد اس کی قضا  کر لے ، لیکن اگر کسی شخص کو طبیعت خراب ہونے کا صرف وہم ہو، غالب گمان نہ ہو تو ایسے آدمی کو روزہ چھوڑنے کی اجازت نہیں ہے۔

اور اگر ایسا مرض ہو کہ اس سے صحت یابی کی امید نہ ہو، اس وجہ سے روزہ نہیں رکھ سکتا، تو ایسے شخص کے لیے فدیہ کا حکم ہے، ایک روزے کا فدیہ ایک صدقہ فطر کی مقدار (پونے دو کلو گندم یا اس کی قیمت) ہے، بعد میں اگر صحت یاب ہوجائے تو جتنے روزے چھوڑے ہوں ان کی قضا لازم ہوگی، اور فدیہ کا ثواب الگ ملے گا۔فقط واللہ اعلم