بہن کو زکاۃ دینا

زکاۃ  اس شخص کو دی جاسکتی ہے  جو  غریب اور ضروت مند ہو  اور اس کی ملکیت میں اس کی ضرورتِ  اصلیہ سے زائد  نصاب   یعنی ساڑھے باون تولہ چاندی کے برابر  رقم نہ ہو ، اور نہ ہی  اس  قدر ضرورت سے زائد  سامان ہو کہ جس کی مالیت نصاب (ساڑھے باون تولہ چاندی کی مالیت) کے برابر بنتی ہے اور نہ  ہی  وہ سید  ، ہاشمی ہے تو اس شخص کے لیے زکاۃ لینا جائز ہے، اور اس کو زکاۃ دینے سے زکاۃ ادا ہوجائے گی، اگر کسی شخص کے  ساڑھے باون تولہ چاندی  یا  اس کے برابررقم ہو، یا ساڑھے سات تولہ سونا ہو، یا ضرورت سے زائد سامان ساڑھے باون تولہ چاندی کے برابر ہو، یا ان میں بعض کا مجموعہ ساڑھے باون تولہ چاندی کے برابر ہو تو اس کو زکاۃ دینا اور اس کے لیے زکاۃ لینا جائز نہیں ہے۔باقی بھائی بہن اگر مستحق زکاۃ ہوں تو  ان کو زکاۃ دینا جائز ہے، بلکہ یہ زیادہ ثواب کا باعث ہے ؛ اس لیے کہ اس میں صلہ رحمی بھی ہے۔

لہذا صورتِ مسئولہ میں اگر آپ کی بہن مستحقِ زکاۃ ہے اور اس کے پاس جو زمین ہے وہ اس کی آمدنی  کا ذریعہ ہےتو اس صورت میں تو اس کو زکاۃ دینا جائز ہوگا، لیکن اگر وہ زمین ذاتی استعمال میں بھی نہ ہو اور نہ ہی  اس کی آمدنی کا ذریعہ ہو تو اس صورت میں زمین کی موجودگی میں وہ زکاۃ  کی مستحق نہیں ہوں گی؛ اس لیے انہیں زکاۃ دینا جائز نہیں ہوگا، اس صورت میں نفلی صدقات سے ان کی مدد کی جائے۔فقط واللہ اعلم