میرے شوہر نے مجھے دو بار طلاق دی ہے، تیسری بار وہ دینے ہی والا تھا کہ اس کی بہن نے اس کے چہرے پر ہاتھ رکھ دیا۔ اس کی ماں اور بہن اس کی گواہ ہیں۔ اور میرے بچے بھی۔ کیا میں شریعت کے مطابق طلاق یافتہ ہوں؟ میں اب خود بھی اس کے ساتھ رہنا نہیں چاہتی ،برائے مہربانی میری رہنمائی فرمائی جائے!
صورتِ مسئولہ میں سائلہ کا شوہر دو طلاقیں دینے کے بعد تیسری طلاق دینے والا تھا کہ اس کی بہن نے اس کے منہ پر ہاتھ رکھ دیا،اگر اس ہاتھ رکھنے سے تیسری بار اس کے منہ سے طلاق کے الفاظ ادا نہیں ہوئے تو ایسی صورت میں سائلہ پر دو طلاقِ رجعی واقع ہو چکی ہیں، طلاقِ رجعی کے بعد شوہر کو عدت (پوری تین ماہواریاں اگر حمل نہ ہو اور اگر حمل ہو تو بچے کی پیدائش تک) کے دوران رجوع کا حق حاصل ہے، اگر عدت کے دوران شوہر نے رجوع کر لیا تو دونوں کا نکاح قائم رہے گا اور پھر شوہر کے پاس صرف ایک طلاق کا اختیار باقی رہے گااور اگر عدت کے دوران رجوع نہیں کیا تو عدت گزرنے کے ساتھ ہی دونوں کا رشتہ ختم ہو جائےگا۔
اور اگر بہن کے ہاتھ رکھنے کے باوجود شوہر کے منہ سے طلاق کے الفاظ ادا ہو گئے تھے تو ایسی صورت میں تیسری طلاق بھی واقع ہو گئی اور سائلہ اپنے شوہر پر حرمتِ مغلظہ کے ساتھ حرام ہو گئی، اب رجوع کی گنجائش نہیں اور دوبارہ نکاح بھی نہیں ہوسکتا، نیز اس صورت میں عدت کے بعد سائلہ دوسری جگہ نکاح کرنے میں آزاد ہوگی، اگر سائلہ دوسری جگہ نکاح کرلےاور دوسرا شوہر صحبت کے بعد سائلہ کوطلاق دے دے یا اس کا انتقال ہو جائے یا سائلہ اس سے طلاق لے لے تو پھر اس کی عدت گزار کر دوبارہ پہلے شوہر سے نکاح کرنا جائز ہوگا۔
فتاوی عالمگیری میں ہے:
"ولو قال أنت طالق وهو يريد أن يقول ثلاثا فقبل أن يقول ثلاثا أمسك غيره فمه أو مات تقع واحدة كذا في محيط السرخسي في باب التشكيك والتخيير".
(كتاب الطلاق، الباب الثاني في إيقاع الطلاق، الفصل الأول في الطلاق الصريح، 1/ 359، ط: رشيدية)
بدائع الصنائع میں ہے:
"أما الطلاق الرجعي فالحكم الأصلي له هو نقصان العدد، فأما زوال الملك، وحل الوطء فليس بحكم أصلي له لازم حتى لا يثبت للحال، وإنما يثبت في الثاني بعد انقضاء العدة، فإن طلقها ولم يراجعها بل تركها حتى انقضت عدتها بانت".
(كتاب الطلاق، فصل:وأما بيان حكم الطلاق، 3/ 180، ط:سعید)
وفيه أيضاً:
"وأما الطلقات الثلاث فحكمها الأصلي هو زوال الملك، وزوال حل المحلية أيضا حتى لا يجوز له نكاحها قبل التزوج بزوج آخر؛ لقوله - عز وجل - {فإن طلقها فلا تحل له من بعد حتى تنكح زوجا غيره} [البقرة: ٢٣٠] "
(کتاب الطلاق ،فصل: وأما حکم الطلاق البائن،3/187،ط:سعید)
فقط والله أعلم
fatwa_number : 144307101676
darulifta : Jamia Uloom Islamiyyah Allama Muhammad Yousuf Banuri Town
