ایک ستر سالہ آدمی اپنی ساٹھ سالہ بیوی کو اچانک گالم گلوچ اور غصہ ہوتا ہے، اس دوران مرد کے منہ سے یہ کلمات ادا ہوئے ہیں، ایک، دو، تین، اب بولو نا، غصہ کرو، مطلب مرد کے کلمات میں طلاق کے الفاظ یا بیوی کا نام نہیں تھا، صرف تین تک گنتی کی، اب مرد کا غصہ ٹھنڈا ہوتے ہی ندامت ہوئی ، کہ میں نے کیا کیا؟
اب دریافت کہ کرنا ہے کہ مذکورہ مرد کی بیوی پر طلاق واقع ہوچکی ہے یا نہیں۔؟
صورتِ مسئولہ میں چوں کہ مذکورہ مرد نے "ایک، دو، تین" کے ساتھ نہ طلاق کے الفاظ کا ذکر کیاہے اور نہ بیوی کی طرف نسبت ہے، اس لیے مذکورہ الفاظ سے کوئی طلاق واقع نہیں ہوئی، دونوں بحیثیت میاں بیوی ایک ساتھ رہ سکتے ہیں ،لیکن غصہ اور جذبات میں ایسے الفاظ استعمال کرنے سے اجتناب کرنا چاہیے ،ذرا سی الفاظ کی تبدیلی سے طلاق بھی واقع ہوسکتی ہے ،اس لیے آئندہ ایسے الفاظ استعمال کرنے سے اجتناب کریں ۔
فتاوى قاضيخان علی ہامش الہندیة میں ہے:
"رجل قال لامرأته: ترايكي أو قال: تراسه، قال الصدر الشهيد رحمه ﷲ تعالى :طلقت ثلاثاً ولو قال: تويكي أو قال :توسه، قال أبو القاسم رحمهﷲتعالى: لا يقع الطلاق ،قال مولانا رضي ﷲ تعالى عنه: وينبغي أن يكون الجواب على التفصيل :إن كان ذلك في حال مذكرة الطلاق أو في حالة الغضب يقع الطلاق وإن لم يكن لا يقع إلا بالنیة كما لو قال بالعربية: أنت واحدة".
(كتاب الطلاق، الباب الخامس فى طلاق المريض، ج:1، ص:464، ط:ماجدية كوئيته)
اس عبارت سے معلوم ہوا ہے کہ " ایک دو تین "سے اضافت کے بغیر طلاق واقع نہیں ہوتی۔
فقط واللہ اعلم
fatwa_number : 144308100862
darulifta : Jamia Uloom Islamiyyah Allama Muhammad Yousuf Banuri Town
