مرد کتنے گرام چاندنی کی انگوٹھی استعمال کرسکتا ہے ؟اور کیا چاندی کی چین گلے میں پہن سکتا ہے؟
مردوں کے لیے ایک مثقال (ساڑھے چار ماشے یعنی۴گرام،۳۷۴ملی گرام (4.374 gm) سے کم وزن کی چاندی کی انگوٹھی پہننا جائز ہے، البتہ عام آدمی کے لیے چاندی کی انگوٹھی بھی نہ پہننا بہتر اور افضل ہے۔
باقی مرد کے لیے چاندی کے علاوہ کسی اور دھات کی انگوٹھی پہننا جائز نہیں ہے، ایک حدیثِ مبارکہ میں ہے: ایک شخص نے دریافت کیاکہ یارسول اللہ! میں کس دھات کی انگوٹھی پہنوں؟تو آپ نے فرمایا: چاندی کی، مگر ایک مثقال تک اس کا وزن نہ پہنچے۔
نیز مرد کے لیے چاندی کی (مذکورہ مقدار وزن کی) انگوٹھی کے علاوہ کسی بھی طرح کا زیور پہننا جائز نہیں ہے، خواہ وہ چاندی کی چین ہو یا کچھ اور۔
الدر المختار وحاشية ابن عابدين (رد المحتار) (6/ 358):
"(ولايتحلى) الرجل (بذهب وفضة) مطلقاً، (إلا بخاتم ومنطقة وجلية سيف منها) أي الفضة ... (ولايتختم) إلا بالفضة؛ لحصول الاستغناء بها، فيحرم (بغيرها كحجر) ... ولايزيده على مثقال"۔ فقط واللہ اعلم
فتوی نمبر : 144107200335
دارالافتاء : جامعہ علوم اسلامیہ علامہ محمد یوسف بنوری ٹاؤن