ہم جدہ میں رہتے ہیں، اگر ہم مکہ میں جاکر احرام باندھ کرعمرہ شروع کریں تو کیا حکم ہوگا؟ یہاں پر کچھ علماء ہیں جوکہتے ہیں کہ حدودِ حرم میں احرام باندھنے سے دم نہیں ہوگا،50۔60 ریال صدقہ ہوگا؟ کیا یہ درست ہے؟ مہربانی فرماکر قرآن اور احادیث کی روشنی میں جواب دیں!
جو شخص جدہ کا رہائشی ہو اور وہ حج و عمرہ کے علاوہ کسی دوسرے کام سے مکہ مکرمہ میں داخل ہونا چاہتا ہو تو اس کے لیے احرام کے بغیر مکہ میں داخل ہونا جائز ہے، اور اگر حج یا عمرہ کا ارادہ ہو تو ایسی صورت میں اس کے لیے احرام باندھ کر ہی مکہ میں داخل ہونا ضروری ہے، اگر وہ احرام کے بغیر مکہ میں داخل ہو گیا اور احرام باندھنے دوبارہ میقات پر بھی نہیں گیا تو اس پر دم لازم ہو گا۔فقط واللہ اعلم
فتوی نمبر : 143909200639
دارالافتاء : جامعہ علوم اسلامیہ علامہ محمد یوسف بنوری ٹاؤن
