سوال

امام امامت کرا رہا ہے اور اس کو نماز کے درمیان حدث لاحق ہوگیا اور اس کے پیچھے تمام کے تمام مقتدی مسبوق ہیں، پھر اس امام نے ایک مسبوق کو آگے کھڑا کردیا پھر اس مسبوق نے نماز پڑھائی تو سلام پھیر نے کے لیے وہ امامِ ثانی کس کو آگے بڑھاۓ گا حالاں کہ تمام مقتدی مسبوق ہیں اور امامِ اول بھی ابھی تک نہیں آیا ہے؟

جواب

واضح رہے کہ اگر امام نے ایسے شخص کو اپنا خلیفہ بنادیا جو خود مسبوق تھا تو اس کے لیے حکم یہ ہے کہ امام کی نماز مکمل ہونے کے بعد سلام پھیرنے کے لیے کسی مدرک کو آگے کردے اور خود پیچھے ہوجائے، تاہم اگر تمام  کے تمام مقتدی  مسبوق ہوں تو ایسی صورت میں حکم یہ ہے کہ مسبوق خلیفہ امام کی بقیہ نماز  مکمل کرنے کے بعد سلام پھیرے بغیر کھڑے ہوجائے اور اپنی بقیہ نماز اکیلے مکمل کرلے اسی طرح دیگر مسبوقین بھی امام کی نماز  مکمل ہونے کے بعد سلام پھیرے بغیر اپنی اپنی بقیہ نماز مکمل کرلیں۔ جیساکہ بدائع الصنائع میں ہے:

"ولو كان من خلف المحدث كلهم مسبوقين ينظر إن بقي علی الامام شيء من الصلاة فإنه يستخلف واحداً منهم؛ لأن المسبوق يصلح خليفةً؛ لما بينا، فيتم صلاة الإمام، ثم يقوم إلى قضاء ما سبق من غير تسليم؛ لبقاء بعض أركان الصلاة عليه، و كذا القوم يقومون من غير تسليم و يصلون وحداناً"...الخ (١/ ٢٣٢، ط: سعيد)۔فقط واللہ اعلم