سوال

1- ایک شخص کی بیوی بلا وجہ میکے میں بیٹھی ہوئی ہے، کیا شوہر پر اس کا نان نفقہ واجب ہوگا؟

2- اگر وہ شوہر سے بلا کسی شرعی عذر کے خلع مانگے تو شوہر اس سے دیے گیے مال سے زیادہ مال کا مطالبہ کر سکتا ہے؛ تاکہ وہ خلع کا مطالبہ نہ کرے؟ 

3- دو بچے لڑکے ہیں، وہ کس کے پاس رہیں گے 7 سال کے بعد؟

جواب

1- بیوی اگر شوہر کی اجازت کے بغیر  بلا وجہ میکے میں بیٹھی ہو وہ ناشزہ ہونے کی وجہ سے نفقہ کی حق دار نہیں، جب تک وہ واپس شوہر کے گھر نہ آجائے یا شوہر اس کو میکے میں رہنے کی اجازت نہ دے دے اس وقت تک شوہر کے ذمہ اس کا نان نفقہ دینا واجب نہیں ہے۔

2- بیوی کا بلا وجہ شوہر سے خلع مانگنا درست نہیں ہے، بلا وجہ خلع مانگنے کی صورت میں اگر شوہر ٹالنے کے لیے بیوی سے خلع کے واسطے مہر کی مقدار سے زیادہ پیسوں کا مطالبہ کرلے؛ تاکہ بیوی  خلع کا مطالبہ چھوڑ دے اور شوہر کا مقصد بحسن و خوبی رشتے کو نبھانا ہو (محض ٹالنا اور تنگ کرنا نہ ہو)  تو اس میں کوئی حرج نہیں ہے، لیکن مہر سے زیادہ پیسے لینا اچھا نہیں ہے۔

3- خلع ہوجانے کی صورت میں دونوں بچے سات سال تک تو ماں کی پرورش میں رہیں گے،اور اس دوران والد کے ذمے بچوں کا معتدل خرچہ ہوگا۔ اور سات سال کی عمر پوری ہوجانے کے بعد وہ بچے اپنے والد کے پاس رہیں گے۔ فقط واللہ اعلم