سوال

کیا فرماتے ہیں علمائے کرام اس مسئلے میں کہ :آیا احناف کے نزدیک سری نمازوں میں امام کے پیچھے دل میں قراءت کرنے کی گنجائش ہے یا نہیں؟

جواب

احناف کے نزدیک امام کی اقتدا میں خاموش رہناضروری ہے،خواہ جہری نمازہویاسری ، زبان سے قراءت کی اجازت نہیں،البتہ دل ہی دل میں سورۂ فاتحہ کے الفاظ کی جانب متوجہ رہنے کوحضرت تھانوی رحمہ اللہ  نے مستحسن لکھاہے۔چناں چہ ایک سالک کے خط کے جواب میں لکھتے ہیں:

''(سری نمازمیں قلب کا خود بخودذکرکی جانب مائل ہوجانا)پسندیدہ حالت ہے،اس میں تبدیلی کی ضرورت نہیں،ہاں! زبان کو حرکت نہ ہو۔اوراگردوسرے اذکارکے بجائے سورہ فاتحہ کے الفاظ کاخیال ہو توزیادہ بہترہے"۔(تربیت السالک جلدسوم،ص:275،ط:زمزم پبلشرز)فقط واللہ اعلم