سوال

نماز میں اگر ستر کھل جائے تو کتنی قدر معاف ہے عورت اور مرد دونوں کے لیے؟ نماز کے اندر سجدے میں پاؤں کی انگلیوں کو اگر کوئی اٹھا لے تو کس درجے معاف ہے؟ اور دونوں پاؤں سے نماز ٹوٹ جاتی ہے یا ایک سے؟ اگر دونوں ٹوٹ جاتا ہے تو اگر ایک رکھ لے اور ایک ہوا میں ہو، تو اس ایک کو رکھنا واجب تھا یا فرض؟ اگر واجب تھا تو سجدہ سہو کرنا پڑے گا یا نہیں؟  

جواب

مرد کا ستر ناف سے لے کر گٹھنوں تک ہے، اور عورت کا سارا بدن ستر ہے، البتہ نماز میں عورت ہتھیلیاں، چہرہ اور پاؤں کھلے رکھ سکتی ہے۔ اگر مرد یا عورت کا ستر اس عضو کے چوتھائی حصے کے بقدر کھل جائے اور ایک رکن کی مقدار یعنی تین مرتبہ سبحان اللہ کہنے کے وقت کے بقدر کھلا رہا تو نماز فاسد ہو گئی۔ اور ایک چوتھائی حصے سے کم کھلا ہو، یا چوتھائی یا اس سے زیادہ کھلا ہو  لیکن ایک رکن کے وقت کے بقدر کھلا نہ رہا تو نماز نہیں ٹوٹے گی۔

پورے سجدے میں پیر کی کسی نا کسی انگلی کا زمین سے لگ جانا ضروری ہے، اگر دونوں پیر اس طرح زمین سے اٹھے رہے کہ کسی انگلی کا کوئی حصہ زمین سے  نہ لگا  تو نماز نہیں ہوگی، دوبارہ پڑھنی پڑے گی۔ سجدہ سہو کرنے سے اس غلطی کی تلافی نہیں ہوگی۔