سوال

"سبحان" نام رکھنا کیسا ہے؟  اسی طرح اللہ تعالی کے وہ کون سے نام ہیں جن سے پہلے عبد لگانا ضروری ہے؟ اللہ کے ناموں پر نام کس طرح رکھنے چاہییں؟  میں نے ایک مولانا صاحب سے پوچھا تھا "سبحان " نام کا، وہ فرماتے ہیں درست ہے،آپ سے مزید راہ نمائی درکار ہے۔

جواب

"سبحان" کے بجائے کوئی دوسرا نام تجویز کرلیں، انبیائے کرام علیہم السلام، صحابہ کرام رضی اللہ عنہم یا اولیاء کرام رحمہم اللہ کے ناموں میں سے کوئی نام منتخب کرلیں ۔

باقی رہی یہ بات کہ اللہ تعالی کے کن ناموں کے ساتھ "عبد " لگانا ضروری ہے اور اللہ تعالی کے نا موں پر نام کس طرح رکھے جائیں؟ تو اس کی تفصیل میں مفتی محمد شفیع صاحب رحمہ اللہ لکھتے ہیں:

" اللہ تعالیٰ کے صفاتی نام دو طرح کے ہیں: پہلی قسم:وہ نام ہیں جوقرآن و حدیث میں غیراللہ کے لیے بھی استعمال ہوئے ہیں اور اللہ تعالیٰ کے لیے بھی۔ غنی، حق، حمید، طاہر، جلیل، رحیم، رشید، علی، کریم، عزیز وغیرہ کا استعمال قرآن و حدیث میں اللہ تعالیٰ کے علاوہ بندوں کے لیے بھی ہواہے؛ لہٰذا ایسے صفاتی نام بندوں کے لیے بھی رکھے جاسکتے ہیں، اور ان ناموں کے ساتھ عبد لگانا ضروری نہیں۔ دوسری قسم:وہ نام ہیں جوقرآن و حدیث میں صرف اللہ تعالیٰ کے لیے استعمال ہوئے ہیں اور غیراللہ کے لیے ان کا استعمال ثابت نہیں ہے۔ "رحمن، سبحان، رزّاق، خالق، غفار " قرآن وسنت میں اللہ تعالیٰ کے سوا دوسروں کے لیے نہیں آتے؛ لہٰذا ان ناموں کے ساتھ کسی کا نام رکھنا ہو تو ان کے ساتھ "عبد" کا لفظ ملانا ضروری ہے، جیسے: عبدالرحمن، عبدالسبحان، عبدالرزاق، عبدالخالق، عبدالغفار وغیرہ۔ بعض لوگ لاعلمی یا لاپروائی کی بنا پر عبدالرحمن کو رحمٰن، عبدالرزاق کو رزّاق، عبدالخالق کو خالق، عبدالغفار کو غفار کہہ کر پکارتے ہیں، ایسا کرنا ناجائز ہے۔" مفتی محمد شفیع صاحب رحمۃ اللہ علیہ فرماتے ہیں: ’’ایسا کرنا گناہِ کبیرہ ہے۔ جتنی مرتبہ یہ لفظ پکارا جاتا ہے اتنی ہی مرتبہ گناہِ کبیرہ کا ارتکاب ہوتا ہے اور سننے والا بھی گناہ سے خالی نہیں ہوتا‘‘۔ (تفسیر معارف القرآن، تفسیر آیت ۱۸۰،ص ۱۳۲، ج ۴) فقط واللہ اعلم