بِسْمِ اللَّهِ الرَّحْمَنِ الرَّحِيم

22 ذو الحجة 1440ھ- 24 اگست 2019 ء

دارالافتاء

 

امام کے ساتھ تکبیرات تشریق دہرانے کا حکم


سوال

عیدالفطر کی نماز سے پہلے جو سعودی عرب میں خطبہ پڑھا جاتا ہے، اس میں امام کے ساتھ تکبیرات تشریق دہرانا واجب ہے یا مسنون ہے؟

جواب

1۔  تکبیراتِ تشریق کا حکم یہ ہے کہ 9 ذوالحجہ کی فجر کی نماز سے لے کر 13 ذوالحجہ کی عصر کی نماز تک (23 نمازوں میں) ہر فرض نماز کے بعد مردوں کے لیے باآوازِ بلند اور عورتوں کے لیے آہستہ آواز سے ایک مرتبہ پڑھنا واجب ہے۔

2۔ عید الاضحیٰ کی نماز کے لیے جاتے ہوئے راستے میں باآوازِ بلند تکبیر پڑھنا مستحب ہے۔ اور بعض فقہاءِ احناف کی تصریح کے مطابق عیدالاضحیٰ میں نمازِ عید شروع ہونے (اور جن علاقوں میں نماز سے پہلے اردو یا کسی اور زبان میں بیان ہوتاہو وہاں امام کے منبر پر آنے ) سے پہلے تک یہ تکبیرات پڑھنی چاہییں۔

3۔ اور حنفیہ کے ہاں راجح اور مفتی بہ قول کے مطابق عید الفطر کی نماز کے لیے جاتے ہوئے یاعیدگاہ میں پہنچ کر بلند آواز سے تکبیر  پڑھنے کا حکم نہیں ہے، بلکہ دل دل میں پڑھنا مستحب ہے۔ 

لہٰذا سعودی عرب میں عید الفطر کی نماز سے پہلے جو تکبیراتِ تشریق پڑھی جاتی ہیں ان کا دہرانا واجب نہیں ہے۔ واضح رہے کہ عیدین کی نماز کے بعد خطبہ دینا سنت ہے، اور سعودی عرب میں بھی عیدین کی نماز کے بعد خطبہ دیا جاتاہے، البتہ عید کی نماز سے پہلے لاؤڈ اسپیکر پر بلند آواز میں تکبیراتِ تشریق اور دیگر کلماتِ ذکر پڑھے جاتے ہیں۔

الجوهرة النيرة على مختصر القدوري (1/ 93)
'(قوله: ولا يكبر في طريق المصلى عند أبي حنيفة) يعني جهراً أما سراً فمستحب، وهذا في عيد الفطر؛ لأن الأصل في الثناء الإخفاء، قال الله تعالى: ﴿وَاذْكُرْ رَّبَّكَ فِيْ نَفْسِكَ تَضَرُّعاً وَّخِيْفَةً وَّدُوْنَ الْجَهْرِ﴾ [الأعراف: 205] وقال عليه الصلاة والسلام : «خير الذكر الخفي» .
(قوله: ويكبر في طريق المصلي عندهما) يعني جهراً ويقطع التكبير إذا انتهى إلى المصلى في رواية . وفي رواية: حتى يفتتح الصلاة'.
فقط واللہ اعلم


فتوی نمبر : 143909200933

دارالافتاء : جامعہ علوم اسلامیہ علامہ محمد یوسف بنوری ٹاؤن



تلاشں

کتب و ابواب

سوال پوچھیں

اگر آپ کا مطلوبہ سوال موجود نہیں تو اپنا سوال پوچھنے کے لیے یہاں کلک کریں، سوال بھیجنے کے بعد جواب کا انتظار کریں۔سوالات کی کثرت کی وجہ سے کبھی جواب دینے میں پندرہ بیس دن کا وقت بھی لگ جاتا ہے

سوال پوچھیں

ہماری ایپلی کیشن ڈاؤن لوڈ کرنے کے لئے