بِسْمِ اللَّهِ الرَّحْمَنِ الرَّحِيم

8 رمضان 1445ھ 19 مارچ 2024 ء

دارالافتاء

 

نو چندی جمرات کی حقیقت اور اس سے متعلق بے بنیاد عقائد و بدعات کا بیان


سوال

نو چندی جمعرات کیا ہے؟ اور کب آتا ہے؟

جواب

قمری (چاند کے حساب والے) مہینے کی پہلی جمعرات عوام میں نو چندی جمعرات کے نام سے مشہور ہے، اور اس جمعرات سے متعلق عوام میں مختلف قسم کے غلط عقائد مشہور ہیں، مثلاً اس جمعرات کو دینی اعتبار سے زیادہ بابرکت سمجھنا، اس رات کو دعا کی زیادہ قبولیت والا سمجھنا، اس رات میں مختلف قسم کی عبادات کرنا اور مزارات پر حاضری دینا وغیرہ، تو اس کا حکم یہ ہے کہ یہ سارے عقائد غلط  و بے اصل ہیں، اس جمعرات کو الگ سے اس طرح کی کوئی فضیلت حاصل نہیں ہے، اور نہ ہی اس جمعرات میں کوئی خاص عبادت کرنا شریعت میں ثابت ہے، لہٰذا اس غلط عقیدے کے ساتھ ایسے اعمال کرنا بدعت کہلائیں گے، اس سے اجتناب کرنا ضروری ہے۔

البتہ بعض متبع سنت بزرگوں نے اپنے بعض جائز عملیات اور وظائف کو نو چندی جمعرات میں کرنے کو اپنے تجربہ کی بنیاد پر زیادہ مفید بتلایا ہے تو اس کی حیثیت ایسی ہے جیسے کوئی ڈاکٹر یا طبیب اپنے تجربہ کی بنیاد پر کسی خاص دوائی کو کسی خاص مقدار اور خاص وقت میں استعمال کرنے کو علاج کے لیے زیادہ مفید بتلائے، لہٰذا ا س سے اس  کی کوئی شرعی حیثیت یا فضیلت ثابت نہیں ہوتی اور نہ ہی ان بزرگوں کا یہ مقصد ہوتا ہے، بلکہ اس کی حیثیت محض ان بزرگوں کے مجربات کی ہوگی۔ فقط واللہ اعلم


فتوی نمبر : 144008200022

دارالافتاء : جامعہ علوم اسلامیہ علامہ محمد یوسف بنوری ٹاؤن



تلاش

سوال پوچھیں

اگر آپ کا مطلوبہ سوال موجود نہیں تو اپنا سوال پوچھنے کے لیے نیچے کلک کریں، سوال بھیجنے کے بعد جواب کا انتظار کریں۔ سوالات کی کثرت کی وجہ سے کبھی جواب دینے میں پندرہ بیس دن کا وقت بھی لگ جاتا ہے۔

سوال پوچھیں